તમે પણ મતદાન કરો અને અન્ય લોકોને પણ મતદાન કરાવોઃ કલેક્ટર

Author: નોબત સમાચાર

તમે પણ મતદાન કરો અને અન્ય લોકોને પણ મતદાન કરાવોઃ કલેક્ટર

જામનગર જિલ્લા ચૂંટણી અધિકારીનો સોશ્યલ મીડિયા ઈન્ફ્લુએન્સર્સ સાથે સંવાદઃ

જામનગર તા. ર૬: જામનગર જિલ્લા ચૂંટણી અધિકારી અને કલેક્ટર બી.કે. પંડ્યાએ સોશિયલ મીડિયા ઈન્ફ્લુએન્સર્સ સાથે મતદાન જાગૃતિલક્ષી સંવાદ કર્યો હતો. તેમણે સોશિયલ મીડિયાના માધ્યમો થકી મતદાન જાગૃતિલક્ષી સંદેશાઓ શેર કરી જામનગરવાસીઓને મતદાન કરવાની સાથે અન્ય લોકોને પણ મતદાન કરાવવાની લોકોને અપીલ કરી હતી.

લોકસભા સામાન્ય ચૂંટણી ર૦ર૪ અંતર્ગત જામનગર જિલ્લાના લોકોમાં મતદાન જાગૃતિ લાવવાના હેતુસર જિલ્લા ચૂંટણી અધિકારી અને કલેક્ટર બી.કે. પંડ્યાના માર્ગદર્શન હેઠળ સ્વીપ એક્ટિવિટી અંતર્ગત મતદાન જાગૃતિલક્ષી કાર્યક્રમોનું આયોજન થઈ રહ્યું છે. તેના ભાગરૂપે જામનગર લાખોટા તળાવ, પુરાતત્વિય સંગ્રહાલયમાં સોશિયલ મીડિયા ઈન્ફ્લુએન્સર સાથે મતદાન જાગૃતિ લક્ષી કાર્યક્રમનું આયોજન જિલ્લા ચૂંટણી અધિકારીના અધ્યક્ષસ્થાને કરવામાં આવ્યું હતું.

આ કાર્યક્રમમાં જામનગર જિલ્લાના સોશિયલ મીડિયા ઈન્ફ્લુએન્સર દ્વારા મતદાનનું મહત્ત્વ, મતદાન કરવા જતી વખતે ક્યા આધાર પુરાવાઓ સાથે રાખવા, એક મતનું મહત્ત્વ, પરિવાર સાથે મતદાન કરવા જવું, પ્રથમ વખત મતદાન કરનાર યુવાઓને મતદાનની અપીલ, વગેરે જેવા મુદ્દાઓ પર મેસેજ આપી જામનગરવાસીઓને મતદાનનું મહત્ત્વ સમજાવવાનો પ્રયાસ કરવામાં આવ્યો હતો. ત્યારપછી જિલ્લા ચૂંટણી અધિકારી અને કલેક્ટર બી.કે. પંડ્યાએ આગામી ૭ મે ના સવારના ૭ વાગ્યાથી ૧૮ વર્ષ ઉપરના જામનગર જિલ્લાના મતદારોને મતદાન કરવા માટે અપીલ કરી હતી. તેમજ જણાવ્યું હતું કે, દિવ્યાંગો, સગર્ભાઓ, સિનિયર સિટીઝન માટે મતદાન મથકો પર અલાયદી સુવિધાઓ ઊભી કરવામાં આવી છે, તેમજ જિલ્લા વિકાસ અધિકારી વિકલ્પ ભારદ્વાજ અને જિલ્લા પોલીસ વડા પ્રેમસુખ ડેલુએ પણ મતદાનનું મહત્ત્વ સમજાવતો મેસેજ આપી લોકોને મતદાન કરવા માટે અપીલ કરી હતી.

સોશિયલ મીડિયા ઈન્ફ્લુએન્સરોએ જિલ્લા ચૂંટણી અધિકારી અને પદાધિકારીઓ તથા અધિકારીઓ સાથે મતદાન જાગૃતિ અંગે કઈ પ્રવૃત્તિઓ કરી શકાય તેમજ સોશિયલ મીડિયામાં મતદાન જાગૃતિલક્ષી રિલ્સ અને વીડિયો શેર કરવા અંગે પણ ચર્ચા કરી હતી. બાદમાં સોશિયા મીડિયાના માધ્યમ થકી લોકસભા ચૂંટણી ર૦ર૪ અંતર્ગત મતદાન જાગૃતિલક્ષી કાર્યક્રમમાં ભાગ લેવા બદલ મહાનુભાવોના હસ્તે તમામ સોશિયલ મીડિયા ઈન્ફ્લુએન્સરને મોમેન્ટો અને સર્ટીફિકેટ આપવામાં આવ્યા હતાં.

આ કાર્યક્રમમાં સોશિયલ મીડિયા ઈન્ફ્લુએન્સર્સ જેમાં નિકુંજ વસોયા, ઊર્મિલ ઝવેરી, પ્રિયંકા પટેલ, હેડ્રીક હેરી, લલિત જોષી, પરાગ વોરા, સતિશચંદ્ર વ્યાસ, માહિ (આર.જે.), નિકુંજ વાઘેલા, જહાન્વી પટેલ, શૈલી ગજ્જર, જગત રાવલ, સામતભાઈ બેલા, ભાવિનભાઈ રબારી સહિતનાઓ ઉપસ્થિત રહ્યા હતાં, તેમજ ડેપ્યુટી મ્યુનિસિપલ કમિશનર ડી.એ. ઝાલા, નાયબ જિલ્લા ચૂંટણી અધિકારી ઝીલ પટેલ, પ્રાંત અધિકારી પી.બી. પરમાર, જિલ્લા પુરવઠા અધિકારી બારડ, નાયબ જિલ્લા વિકાસ અધિકારી વિમલ ગઢવી, આસિસ્ટન્ટ કમિશનર બી.એન. જાની, સ્વીપ નોડેલ અધિકારી બી.એન. વિડજા, પદાધિકારીઓ અને અધિકારીઓ ઉપસ્થિત રહ્યા હતાં. સમગ્ર કાર્યક્રમનું સંચાલન જયેશ વાઘેલા દ્વારા કરવામાં આવ્યું હતું.

જો આપને આ પોસ્ટ ગમી હોય તો શેર કરો...