ખેડૂતને આત્મહત્યાની દુષ્પ્રેરણા અંગે ડાંગરવાડાના ત્રણ સામે ફોજદારી

Author: નોબત સમાચાર

ખેડૂતને આત્મહત્યાની દુષ્પ્રેરણા અંગે ડાંગરવાડાના ત્રણ સામે ફોજદારી

બે શખ્સે દોઢ વીઘા જમીન અને એક શખ્સે રૂપિયા અઢી લાખ આપવા કર્યાે હતો ઈન્કારઃ

જામનગર તા. ૨૪: કાલાવડના ડાંગરવાડા ગામમાં એક ખેડૂતની ૧૯ વીઘા જમીનની માપણી કરાવાતા દોઢ વીઘા જમીન બાજુના ખેતરમાં જતી હોવાનું જણાઈ આવતા આ ખેડુતે પોતાની જમીન પરત આપવા શેઢા પાડોશીને વિનંતી કરી હતી. તેમ છતાં આ બે શખ્સે જમીન પરત આપી ન હતી અને બીજા એક શખ્સે રૃા.અઢી લાખ પરત આપવાની ના પાડી દીધી હતી તેનાથી કંટાળી ખેડૂતે પાંચ મહિના પહેલા આત્મહત્યા કરી હતી. પોલીસે તેમના પુત્રની ફરિયાદ પરથી ગુન્હો નોંધ્યો છે.

કાલાવડ તાલુકાના ડાંગર વાડા ગામમાં વસવાટ કરતા જેઠાભાઈ વોરા નામના પટેલ ખેડૂતની જગ્યા ડાંગરવાડાની સીમમાં આવેલી છે. તે જગ્યા અંગે માપણી કરાવાતા તેઓની ૧૯ વીઘા જમીનમાંથી દોઢેક વીઘા જેટલી જમીન બાજુમાં ખેતર ધરાવતા પ્રવીણભાઈ તેજાભાઈ કાકડીયાના ખેતરમાં નીકળતા તે ૨૪ ગુંઠા જમીન કાઢી આપવા જેઠાભાઈએ અવારનવાર પ્રવીણભાઈને કહ્યું હતું. તેમ છતાં પ્રવીણભાઈ તે જગ્યા પરત આપતા ન હતા.

તે પછી જેઠાભાઈ પોતાના પુત્ર જીતેન્દ્રભાઈ વોરા સાથે રાજકોટ રહેવા ચાલ્યા ગયા હતા. પ્રવીણ તથા તેના પિતરાઈ નાથા ટપુભાઈ કાકડીયા પણ જમીન ખાલી ન કરી આપવાની તરફેણ કરતો હોય, જેઠાભાઈ પરેશાન થઈ ગયા હતા. આ વ્યક્તિઓને અવારનવાર ફોન કરીને જેઠાભાઈ જમીન ખાલી કરી આપવા વિનંતી કરતા હતા. તેમ છતાં આ શખ્સો જવાબ આપતા ન હતા.

તે ઉપરાંત જેઠાભાઈએ ડાંગરવાડાના જ મનસુખભાઈ અકબરી પાસેથી પણ રૂપિયા અઢી લાખ લેવાના થતાં હતા તે રકમની ઉઘરાણી કરી હતી. મનસુખભાઈ પણ પૈસા આપવાની ના પાડતા હતા. આથી ગયા માર્ચ મહિનાની ૭ તારીખે રાજકોટથી મોટરમાં ડાંગરવાડા આવેલા જેઠાભાઈ એ ઉપરોક્ત શખ્સોના ત્રાસથી મોટરમાં જ ઝેરી દવા પી લીધી હતી. તેઓનું મૃત્યુ નિપજ્યું હતું. દવા પીતા પહેલાં જેઠાભાઈએ સ્યુસાઈડ નોટ લખી હતી જેમાં ઉપરોક્ત ત્રણેય શખ્સના નામ લખેલા હતા. આ બાબતની તપાસ શરૂ થયા પછી ગઈકાલે જેઠાભાઈના પુત્ર જીતેન્દ્રભાઈએ કાલાવડ ગ્રામ્ય પોલીસ મથકમાં પ્રવીણ તેજાભાઈ, નાથા ટપુભાઈ કાકડીયા અને મનસુખભાઈ અકબરી સામે ફરિયાદ નોંધાવી છે. પોલીસે બીએનએસની કલમ ૧૦૮, ૩ (પ) હેઠળ ગુન્હો નોંધ્યો છે.

જો આપને આ પોસ્ટ ગમી હોય તો શેર કરો...