Author: નોબત સમાચાર
જામનગરમાં દલિતનગરમાં ત્રણ મકાનમાં ચોરીઃ નવામાવના ગામમાં ધોળે દહાડે ખાતર
ઠંડીની સાથે તસ્કરોનો પણ વધ્યો પ્રકોપઃ કુલ રૂ.૨ લાખની મત્તાની ચોરીની રાવઃ
જામનગર તા.૨૦ : જામનગર શહેર તથા જિલ્લામાં ઠંડીના વધતા જતા પ્રમાણ વચ્ચે તસ્કરો બેફામ બની ચોરીઓ કરી રહ્યા છે. જામનગરના હનુમાન ટેકરી પાસેના દલિતનગરમાં બુધવારની રાત્રે ત્રણ મકાનમાં ચોરી થઈ છે. લેપટોપ, રોકડ, ચાંદીના સિક્કા, સાંકળા, સોનાની નથ, ડીવીડી પ્લેયર વગેરે ઉઠાવાયા છે. જ્યારે જોડિયાના નવામાવના ગામમાં એક મકાનમાં ગયા રવિવારે સવારથી સાંજ સુધીમાં સોના, ચાંદીના દાગીના, રોકડ મળી રૂ.૧ લાખ ૩૨ હજારની મત્તા ચોરાઈ ગઈ છે.
જામનગરના હનુમાન ટેકરી વિસ્તારમાં આવેલા દલિતનગર ની શેરી નં.૪માં રહેતા વિશાલ મનજીભાઈ પરમાર નામના આસામીના મકાનમાં બુધવારે રાત્રિના દસ વાગ્યાથી રાત્રિના એક વાગ્યા દરમિયાન કોઈ તસ્કર ઘરની દીવાલ ટપી જઈ ઘૂસી ગયો હતો.
આ તસ્કરે એક રૂમમાં મારવામાં આવેલુ તાળુ તોડી નાખી અંદર પડેલા કબાટમાંથી રૂ.૩૦ હજારનંુ લેપટોપ, રૂ.૧૦ હજાર રોકડા, ચાંદીના સાંકળા, ચાંદીના બે સિક્કા, સોનાની નથ ચોરી કરી લીધી હતી. તે મકાનમાં હાથફેરો કર્યા પછી તસ્કરે બાજુમાં આવેલા કમલેશભાઈ નામના આસામીના મકાનમાં પણ દરવાજાનું તાળુ તોડી અંદરથી ડીવીડી પ્લેયર, ટીનનો ડબ્બો અને ત્રીજા પાડોશી રાજુભાઈના મકાનનો દરવાજો તોડી અંદરથી રૂ.૨૦ હજાર રોકડા ચોરી કરી લીધા હતા.
ત્રણેય આસામીના મકાનમાંથી કુલ રૂ.૭૦,૫૦૦ ની મત્તા ચોરાયાની વિશાલ પરમારે સિટી સી ડિવિઝન પોલીસ સ્ટેશનમાં ફરિયાદ નોંધાવી છે. પીએસઆઈ એમ.વી. દવેએ બીએનએસની કલમ ૩૩૧ (૪), ૩૦૫ હેઠળ ગુન્હો નોંધી તપાસ આરંભી છે.
જોડિયા તાલુકાના નવા માવના ગામમાં આવેલા દયાળજીભાઈ પેથાભાઈ રામપરીયા નામના આસામીના મકાનમાં ગયા રવિવારે સવારે અગિયાર વાગ્યાથી સાંજના પાંચ વાગ્યા દરમિયાન ચોરી થઈ છે. તેમના મકાનના દરવાજા પર મારવામાં આવેલુ તાળુ તોડી ઘૂસેલા તસ્કરે અંદરથી રૂ.૮૧૦૦ રોકડા, સોનાનું ૩૦ ગ્રામનું રૂ.૯૦ હજારની કિંમતનું મંગળસૂત્ર, ૧૦ ગ્રામનો રૂ.૩૦ હજારનો સોનાનો હાર, રૂ.૩ હજારની ત્રણ ગ્રામની સોનાની વીટી, ચાંદીની રૂ.૯૦૦ની કિંમતની ઝાંઝરી મળી કુલ રૂ.૧ લાખ ૩૨ હજારની માલમત્તા ચોરાઈ ગઈ છે. દયાળજીભાઈએ જોડિયા પોલીસ સ્ટેશનમાં ગઈ કાલે બપોરે ફરિયાદ નોંધાવી છે. પોલીસે બીએનએસની કલમ ૩૩૧ (૩), ૩૦૫ (એ) હેઠળ ગુન્હો નોંધયો છે.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
