વાડીનાર, સલાયા, નાગેશ્વરમાંથી તીનપત્તી રમતા બાર શખ્સની પોલીસ દ્વારા ધરપકડ

Author: નોબત સમાચાર

વાડીનાર, સલાયા, નાગેશ્વરમાંથી તીનપત્તી રમતા બાર શખ્સની પોલીસ દ્વારા ધરપકડ

દ્વારકામાં ચલણી નોટના નંબર પર જુગાર રમતા બે શખ્સ ઝબ્બેઃ

જામનગર તા. ૩: ખંભાળિયા તાલુકાના વાડીનાર તથા સલાયામાંથી પોલીસે સાત પત્તાપ્રેમીને પકડી લીધા છે. નાગેશ્વર નજીકથી પાંચ શખ્સ ગંજીપાના કૂટતા ઝડપાયા છે. રૂપેણ બંદર અને ઓખામાંથી ચાર શખ્સ તીનપત્તી રમતા મળી આવ્યા છે અને દ્વારકામાં ચલણી નોટના નંબર પર એકીબેકી બોલતા બેની ધરપકડ કરાઈ છે.

ખંભાળિયા તાલુકાના વાડીનારમાં રવિવારે બપોરે એક ખૂલી જગ્યામાં જુગારની મહેફિલ જામી હોવાની બાતમી પરથી પોલીસે દરોડો પાડ્યો હતો. ત્યાં ગંજીપાના કૂટી રહેલા સુલેમાન અબ્દુલ સંઘાર, સતાર બચુભાઈ પીરજાદા, આસીફ સતાર સુંભણીયા, રફીક આમદ સંઘાર, ઉમર અબ્દુલ સંઘાર નામના પાંચ શખ્સ મળી આવ્યા હતા. પોલીસે પટમાંથી રૂ.૧૨૫૯૦ રોકડા, બે મોબાઈલ કબજે કરી ગુન્હો નોંધ્યો છે.

સલાયામાં ઈદગાહ પાછળ શનિવારે સાંજે રોનપોલીસ રમતા જાવીદ આદમ બારોયા, સદામ સલીમ ભગાડ નામના બે શખ્સને પોલીસે પકડી લઈ રોકડ તથા ગંજીપાના કબજે કર્યા છે.

મીઠાપુર નજીક નાગેશ્વર ગામની સીમ વિસ્તારમાં શનિવારે સાંજે તીનપત્તી રમતા રામભા પાંચારીયાભા સુમણીયા, માયાભા ધુધાભા સુમણીયા, કાલીદાસ પુરનદાસ નિરંજની, વલીમામદ ઉમર ચાવડા, સતાર આદમ કાટીયા નામના પાંચ શખ્સને મીઠાપુર પોલીસે પકડી લઈ રૂ.૨૬૫૦૦ રોકડા પટમાંથી કબજે કર્યા છે.

દ્વારકામાં સનાતન આશ્રમના રોડ પરથી શનિવારે બપોરે ગની અબ્દુલ ચંગડા ઉર્ફે આમદ અને અબ્બાસ ઓસમાણ દલ નામના બે શખ્સ ચલણી નોટના નંબર પર એકીબેકી બોલતા ઝડપાઈ ગયા છે.

દ્વારકા નજીક રૂપેણ બંદરમાં બાવળની ઝાળીઓમાં તીનપત્તી રમતા શબ્બીર જુમા ચૌહાણ, ગોરધનભાઈ શામજીભાઈ બારીયા નામના બે શખ્સને પોલીસે પકડી લઈ રોકડ કબજે કરી છે.

ઓખાના બસ સ્ટેશન પાસે તીનપત્તી રમતા દાવા મામદ સોઢા અને મહેશ લાલાભાઈ ચાવડા નામના બે શખ્સને પોલીસે પકડી લીધા હતા.

જો આપને આ પોસ્ટ ગમી હોય તો શેર કરો...