નવાગામ ઘેડમાં યુવાન પર હુમલો કરી બે શખ્સે નિપજાવી હત્યાઃ મૃતકના ભાણેજે કરી ફરિયાદ

Author: નોબત સમાચાર

નવાગામ ઘેડમાં યુવાન પર હુમલો કરી બે શખ્સે નિપજાવી હત્યાઃ મૃતકના ભાણેજે કરી ફરિયાદ

છૂટાછેડા આપી દીધા પછી પૂર્વ પત્નીને ફોન કર્યાનું મનદુખ રાખી ઢીમ ઢાળી દેવાયું:

જામનગર તા. ૨૪: જામનગરના નવાગામ ઘેડમાં રહેતા એક યુવાનના ઘેર રવિવારની રાત્રે ધસી આવેલા બે શખ્સે ઢીકાપાટુથી હુમલો કર્યા પછી દાંતરડા તથા કોશથી માર મારી આ યુવાનની હત્યા નિપજાવ્યાની પોલીસમાં મૃતકના ભાણેજે ફરિયાદ નોંધાવી છે. મૃતકના છ મહિના પહેલાં જે મહિલા સાથે છૂટાછેડા થયા હતા. તે મહિલાને ફોન કરતા હાલમાં તેની સાથે રહેતા શખ્સ તથા તેના સાગરિતે હત્યા કર્યાની વિગત ફરિયાદમાં જણાવાઈ છે. પોલીસે હુમલાખોરોની શોધખોળ શરૂ કરી છે.

જામનગરના નવાગામ ઘેડ વિસ્તારમાં આવેલી ઈન્દિરા સોસાયટીની શેરી નં.૭માં વસવાટ કરતા મિલનભાઈ હેમતભાઈ પરમાર નામના બેતાલીસ વર્ષના ખવાસ યુવાન ગઈકાલે સવારે તેમના રહેણાંકમાંથી મૃત હાલતમાં મળી આવ્યા હતા.

ત્યાં દોડી આવેલા તેમના પરિવારજનોએ પોલીસને વાકેફ કર્યા પછી પોલીસે મૃતદેહને પી.એમ. માટે ખસેડી મૃત્યુનું કારણ જાણવા તપાસ આદરી હતી. જેમાં મૃતક મિલનભાઈના ભાણેજ અને નવાગામ ઘેડમાં જ રહેતા યશ હસમુખભાઈ ગોહિલે ફરિયાદ નોંધાવી છે.

ફરિયાદમાં જણાવવામાં આવ્યા મુજબ મિલનભાઈના પત્ની દક્ષાબેેને છએક મહિના પહેલાં જ છૂટાછેડા લીધા હતા. તે પછી દક્ષાબેન મધુરમ રેસીડેન્સીમાં મયુર ગોહિલ નામના શખ્સ સાથે સંતાનો સાથે રહેવા ચાલ્યા ગયા હતા. તે પછી મિલનભાઈએ રવિવારે પૂર્વ પત્ની દક્ષાબેનને ફોન કરતા રવિવારની રાત્રે એકાદ વાગ્યે મયુર ગોહિલ, સંજય તથા અન્ય વ્યક્તિ મિલનભાઈના ઘેર આવ્યા હતા. જ્યાં મિલનભાઈને તું ફોન કેમ કરશ તેમ કહી મયુર તથા સંજયે ગાળો ભાંડ્યા પછી ઢીકાપાટુ, લાફાથી માર માર્યાે હતો. મિલનભાઈના ઘરમાં પડેલી કોશ અને દાંતરડાથી હુમલો કરી આ વ્યક્તિઓએ ઈજા પહોંચાડી હતી.

આ સમયે દોડી આવેલા અશોકભાઈ વચ્ચે પડતા તેઓને પણ માર મારવામાં આવ્યો હતો. ત્યારપછી હુમલાખોરો નાસી ગયા હતા અને ગંભીર ઈજા પામેલા મિલનભાઈનું મૃત્યુ નિપજ્યું છે. આ ફરિયાદ પરથી પોલીસે હત્યાનો ગુન્હો નોંધી મયુર ગોહિલ, સંજય તથા અન્ય વ્યક્તિઓની શોધ હાથ ધરી છે.

જો આપને આ પોસ્ટ ગમી હોય તો શેર કરો...