કાલાવડ વીજ કચેરીના ડે. ઈજનેરની બદલીના પગલે હડતાળની અપાઈ ચીમકી

Author: નોબત સમાચાર

કાલાવડ વીજ કચેરીના ડે. ઈજનેરની બદલીના પગલે હડતાળની અપાઈ ચીમકી

ઈજનેર એસોસિએશન દ્વારા અપાયું આવેદનઃ

જામનગર તા. ૨૪: કાલાવડ વેસ્ટ સબ ડિવિઝનમાં ફરજ બજાવતા વીજ કંપનીના ડે. ઈજનેરની અંજાર બદલી કરાતા જીઈબી એન્જિનિયર્સ એસોસિએશન વિફર્યું છે. બદલી રોકવામાં ન આવે તો હડતાળ કરવા અંગે ચીમકી આપવામાં આવી છે.

કાલાવડ સ્થિત પશ્ચિમ ગુજરાત વીજ કંપનીની કચેરીમાં ડેપ્યુટી એન્જિનિયર તરીકે ફરજ બજાવતા વી.એચ. ભેડાની કચ્છના અંજાર સર્કલમાં બદલી કરવાનો હુકમ આવતા જીઈબી એન્જિનિયર્સ એસોસિએશન વિફર્યું છે.

આ બાબતે એસોસિએશનના હોદ્દેદારોએ જામનગરના અધિક્ષક એન્જિનિયર એચ.ડી. વ્યાસને આવેદનપત્ર પાઠવી જણાવ્યું છે કે, કાલાવડ વેસ્ટ સબ ડિવિઝનમાં ફરજ બજાવતા ડે. ઈજનેર ભેડાને રાત્રે સાડા બારેક વાગ્યે એક ગ્રાહકનો ફોન આવ્યો હતો. જેમાં જામવાડી જયોતિ ગ્રામ યોજનાના સાત ગામને જોડતા ફીડરની ફરિયાદ અંગે વાતચીત કરાઈ હતી.

આ વાતચીતના રેકોર્ડિંગમાં ભેડાએ શિષ્ટ અને વ્યવસાયીક ભાષામાં ફીડરની લંબાઈ ઘટાડવામાં મારૂ ન ચાલે તેમ કહેતા આ અધિકારીની રાજકીય ઈશારે બદલી કરવામાં આવી છે. તે બદલી રોકવામાં નહીં આવે તો આગામી સોમવારે સૂત્રોચ્ચાર અને તા.૧ જુલાઈએ વર્ક ટુ રૂલ તેમજ તા.૧૧ જુલાઈથી હડતાળ કરવામાં આવશે.

જો આપને આ પોસ્ટ ગમી હોય તો શેર કરો...