જામનગરના દરેડ પાસે દેશી દારૂની ડિલિવરી દેવા આવેલા બે પકડાયા

Author: નોબત સમાચાર

જામનગરના દરેડ પાસે દેશી દારૂની ડિલિવરી દેવા આવેલા બે પકડાયા

ગાંધીનગરથી ખાસ ટૂકડીએ દરોડો પાડતા ખળભળાટઃ

જામનગર તા. ૨૮: જામનગરના દરેડથી મસીતીયા રોડ પર આવેલા પાણીના ટાંકા પાસે એક દુકાનમાં દેશી દારૂનો જથ્થો ઉતારાતો હોવાની બાતમી પરથી ગાંધીનગરથી દોડી આવેલી સ્ટેટ મોનીટરીંગ સેલના સ્ટાફે દરોડો પાડી બે શખ્સને ૮૯૫ લીટર દેશી દારૂ સાથે પકડી પાડ્યા છે. કાયદાથી સંઘર્ષિત કિશોર સહિત ત્રણના નામ મળવા પામ્યા છે. ત્રણ વાહન મળી રૂપિયાપોણા છ લાખનો મુદ્દામાલ કબજે કરાયો છે. આ ટીમના દરોડાથી ખળભળાટ મચ્યો છે.

જામનગર નજીકના દરેડ ગામથી મસીતીયા તરફ જવાના રોડ પર દેશી દારૂની હેરાફેરી થઈ રહી હોવાની બાતમી પરથી ગાંધીનગરથી સ્ટેટ મોનીટરીંગ સેલની ટૂકડી ધસી આવી હતી.

આ ટૂકડીના પીએસઆઈ એસ.વી. ગળચર તથા સ્ટાફે લાલપુર તાલુકાના પીપળી ગામનો હરદાન દેશરભાઈ ગુજરીયા ઉર્ફે લાલો ચારણ નામનો શખ્સ પોતાની મોટરમાં દેશી દારૂનો જથ્થો ડિલિવર કરવા આવ્યો ત્યારે પકડી પાડ્યો હતો તેની સાથે દેવસુર આલાભાઈ ઘોડા નામનો લાલપુરનો શખ્સ તથા કાયદાથી સંઘર્ષિત એક કિશોર પણ હતો.

ત્રણેય વ્યક્તિ જ્યારે પોતાની મોટરમાંથી દરેડમાં પોતાના મામા રામદેવ ઉર્ફે ભોપા માતકાની દુકાનમાં દારૂ ઉતારતા હતા. ત્યારે જ સ્ટેટ મોનીટરીંગ સેલ ત્રાટકી હતી. હરદાન દેવસુર, રામદે માતકા, કાયદાથી સંઘર્ષિત કિશોર તથા કિશોરની અટકાયત કરાઈ છે. આ શખ્સો ભાણવડ તાલુકાના ટીંબડી-ફિલ્ટરનેસવાળા શકુર બધાભાઈ રબારી પાસેથી દારૂનો જથ્થો લાવી, શકુરના માણસ પાસેથી દારૂની ડિલિવરી મેળવી જામનગરના દરેડમાં રામદે ઉર્ફે ભોપાને વેચાણ માટે દેશી દારૂ આપવા આવ્યા ત્યારે કાયદાથી સંઘર્ષિત કિશોર ભોપા વતી હાજર રહી દુકાનમાં દેશી દારૂ ઉતરાવતો હતો. હરદાન, દેવસુર, શકુર, ભોપા તેમજ કાયદાથી સંઘર્ષિત કિશોર અને શકુરના અજાણ્યા માણસ સામે પંચકોશી બી ડિવિઝન પોલીસ સ્ટેશનમાં ગુન્હો રજીસ્ટર કરાવાયો છે. પીઆઈ વી.જે. રાઠોડે ગુન્હો નોંધી આરોપીની પૂછપરછ હાથ ધરી છે. પોલીસે ૮૯૫ લીટર દેશી દારૂ, ત્રણ વાહન મળી રૂપિયા પોણા છએક લાખનો મુદ્દામાલ કબજે કરી લીધો છે.

જો આપને આ પોસ્ટ ગમી હોય તો શેર કરો...