સીદી સમાજની જગ્યામાં અપપ્રવેશના નોંધાયેલા ગુન્હામાં બે આરોપીની ધરપકડ

Author: નોબત સમાચાર

સીદી સમાજની જગ્યામાં અપપ્રવેશના નોંધાયેલા ગુન્હામાં બે આરોપીની ધરપકડ

દોઢેક મહિના પહેલાં કરાઈ હતી પોલીસમાં ફરિયાદઃ

જામનગર તા. ૨૮: જામનગરના સીદી સમાજના પૂર્વ પ્રમુખ અને તેના પુત્ર સહિતના વ્યક્તિઓ સામે સમાજની જગ્યામાં અપપ્રવેશ કરવા અંગે થોડા સમય પહેલાં ગુન્હો નોંધાયા પછી પોલીસે તપાસ શરૂ કરી હતી. તેના અંતે આરોપી પૈકીના પિતા-પુત્રની તાજેતરમાં પોલીસે ધરપકડ કરી હતી.

જામનગરના સમસ્ત સીદી સમાજ દ્વારા થોડા સમય પહેલાં રજૂઆત કરવામાં આવી હતી કે, સમાજના પૂર્વ પ્રમુખ અખ્તરહુસેન વગીડા વગેરે દ્વારા સમાજની જગ્યાની ચાવી લેવા ગયેલા વ્યક્તિઓને ધાક ધમકી આપવામાં આવી છે.

આ બાબતની સિટી બી ડિવિઝન પોલીસ સ્ટેશનમાં ગયા નવેમ્બર મહિનામાં ફરિયાદ નોંધાવવામાં આવી હતી. તે ફરિયાદની તપાસ પીઆઈ પી.પી. ઝાની સુચનાથી પીએસઆઈ ડી.જી. રાજ તથા સ્ટાફ દ્વારા હાથ ધરાઈ હતી.

તે દરમિયાન આરોપી અખ્તરહુસેન વગીડા, તેના પુત્ર ફરદીન વગીડાની તાજેતરમાં પીએસઆઈ ડી.જી. રાજે અપપ્રવેશ કરવા અંગેના નોંધાયેલા ગુન્હામાં ધરપકડ કરી હતી. તે પછી આરોપીઓને અદાલતમાં રજૂ કરવામાં આવ્યા હતા. આ સમાચારમાં માનવસહજ ભૂલથી ગઈકાલે દેશી દારૂ અંગેના પોલીસના કોમ્બિંગ સાથેના સમાચારમાં આ બંને વ્યક્તિનો નામોઉલ્લેખ થયો હતો. જ્યારે આ બંનેની અપપ્રવેશના ગુન્હામાં પોલીસે ધરપકડ કરી હતી.

જો આપને આ પોસ્ટ ગમી હોય તો શેર કરો...