વરવાળા પાસે સર્જાયેલા અકસ્માતમાં મોટરચાલક તથા મહિલાનું પણ મૃત્યુ

Author: નોબત સમાચાર

વરવાળા પાસે સર્જાયેલા અકસ્માતમાં મોટરચાલક તથા મહિલાનું પણ મૃત્યુ

આ અકસ્માતમાં મૃત્યુઆંક ત્રણનો થયોઃ

જામનગર તા.૯ : ઓખા મંડળના ભીમરાણા પાસે મંગળવારે સર્જાયેલા ટ્રક તથા મોટર વચ્ચેના અકસ્માતમાં કેરળના એક વ્યક્તિનું ઘટના સ્થળે મૃત્યુ થયા પછી ઘવાયેલા મૃતકના પત્ની તથા મોટરચાલક પણ મૃત્યુ પામ્યા છે. ટ્રકચાલક સામે પોલીસે ગુન્હો નોંધ્યો છે.

દેવભૂમિ દ્વારકા જિલ્લાના ઓખામંડળમાં આવેલા ભીમરાણા ગામ પાસે મંગળવારે બપોરે સેન્ટ મેરી સ્કૂલ નજીક જીજે-૩૭-ટી ૯૮૯૯ નંબરનો એક ટ્રક રોંગસાઈડમાં ધસી આવ્યો હતો. તે ટ્રકે સામેથી આવતી મોટરને ટક્કર મારતા અકસ્માત સર્જાયો હતો.

આ ગમખ્વાર અકસ્માતમાં મોટરના ચાલક હેમેન્દ્રભાઈ તાવડીવાલા તેમજ કેરળથી બેટ દ્વારકા દર્શનાર્થે આવેલા ઓ.બી. વાસુદેવન અને તેમના પત્ની યામીનીબેનને ગંભીર ઈજા થઈ હતી. બનાવના સ્થળે ઓ.બી. વાસુદેવનનું મૃત્યુ નિપજ્યું હતું. જ્યારે યામીનીબેન તથા હેમેન્દ્રભાઈ રમેશભાઈ તાવડીવાલાને ગંભીર ઈજા થઈ હતી.

બંને ઈજાગ્રસ્તને ૧૦૮ મારફત હોસ્પિટલમાં ખસેડવામાં આવ્યા હતા. જ્યાં તેમના મૃત્યુ નિપજ્યા છે. કૌશિક રમેશભાઈ તાવડી વાલાએ પોલીસમાં ફરિયાદ નોંધાવી છે. પોલીસે ટ્રકચાલક સામે ગુન્હો નોંધ્યો છે.

જો આપને આ પોસ્ટ ગમી હોય તો શેર કરો...