ભાણવડના ગુંદા ગામની જમીનના મામલે નાના આસોટાના આસામી પર થયો હલ્લો

Author: નોબત સમાચાર

ભાણવડના ગુંદા ગામની જમીનના મામલે નાના આસોટાના આસામી પર થયો હલ્લો

છરી-પાઈપ, ધોકાથી સાત શખ્સ તૂટી પડ્યાઃ

જામનગર તા. ૧૯: ખંભાળિયાના નાના આસોટાના એક આસામીએ પાંચ વર્ષ પહેલા ભાણવડના ગુંદામાં ખરીદેલી જમીનના દસ્તાવેજમાં નામ ન લખવાની બાબતે સોમવારે રૂપામોરા રોડ પર આ આસામી પર સાત શખ્સે હુમલો કર્યાે હતો.

ખંભાળિયા તાલુકાના નાના આસોટા ગામના રામશીભાઈ વીરાભાઈ ખુંટી નામના આસામી તથા આલાભાઈ ખુુંટીએ ભાણવડ તાલુકાના ગુંદા ગામમાં વર્ષ ૨૦૨૦માં કરશનભાઈ જોગલ નામના આસામી પાસેથી જમીન વેચાતી લીધા પછી દસ્તાવેજ બનાવડાવ્યો હતો. ત્યારપછી કરશનભાઈના પુત્ર વિજય તથા રણમલ મારખીભાઈ ગોજીયા નામના બે શખ્સ ખોટી અરજીઓ કરી રામશીભાઈને હેરાનગતિ કરતા હતા અને પૈસા આપવા બાબતે પરેશાન કરતા હતા.

તે અરજી અન્વયે સોમવારે રામશીભાઈ તથા અન્ય વ્યક્તિઓ ભાણવડ પોલીસ મથકે આવ્યા હતા અને ત્યાંથી પરત જવા માટે સાંજે જયારે નીકળ્યા પછી રૂપામોરા ગામના રોડ પર પહોંચ્યા ત્યારે રણમલ, વિજય, કરશન ભીખાભાઈ, ગોવિંદ રણમલભાઈ, ભાવેશ દેવશીભાઈ, નિલેશ ચાવડા, નથુ ભાયાભાઈ નામના સાત શખ્સે પાઈપ, ધોકા, છરી સાથે ધસી આવી રામશીભાઈની મોટર આડે બાઈક ઉભા રાખી દઈ હુમલો કર્યાે હતો. ગાડીમાં બેઠા રહેલા રામશીભાઈને બહાર કાઢવાનો પ્રયાસ કરી નથુ ભાયાભાઈએ પાઈપ ફટકાર્યાે હતો અને રણમલ મારખીભાઈએ ગુંદાવાળી જમીનના દસ્તાવેજમાં મારૂ નામ કેમ લખ્યું નથી તેમ કહી ગાળો ભાંડી પતાવી દેવાની ધમકી આપી હતી.

જો આપને આ પોસ્ટ ગમી હોય તો શેર કરો...