ગુજરાત સહિત ૧૪ રાજ્યોમાં વાવાઝોડા સાથે વરસાદની આગાહી

Author: નોબત સમાચાર

ગુજરાત સહિત ૧૪ રાજ્યોમાં વાવાઝોડા સાથે વરસાદની આગાહી

ભારતીય હવામાન વિભાગ દ્વારા

નવી દિલ્હી તા. ર૮: ભારતીય હવામાન વિજ્ઞાન વિભાગે આગામી ર જૂન સુધી દેશના વિવિધ ભાગોમાં ભારે વરસાદ, વાવાઝોડું, વીજળી અને ભારે પવનને લઈને ચેતવણી જાહેર કરી છે. દક્ષિણ ભારત, પશ્ચિમી તટ, પૂર્વ-ઉત્તર ભારત, પૂર્વ અને મધ્ય ભારત તેમજ ઉત્તર ભારતના ઘણાં રાજ્યોમાં તેની અસર જોવા મળશે. કેટલાક વિસ્તારોમાં અતિભારે વરસાદ અને ગાજવીજ સાથે તોફાની પવન ફૂંકાવાની સંભાવના છે, જ્યારે કેટલાક વિસ્તારોમાં લૂ (હીટવેવ) નો પણ ખતરો યથાવત્ છે.

જમ્મુ-કાશ્મીર, હિમાચલ પ્રદેશ, ઉત્તરાખંડ, પંજાબ, હરિયાણા, દિલ્હી અને રાજસ્થાનમાં ર૮ મે થી ર જૂન દરમિયાન વરસાદ, વીજળી અને ૭૦ કિ.મી. પ્રતિકલાક સુધીની ઝડપે તોફાની પવન ફૂંકાવાનું અનુમાન છે. હિમાચલ પ્રદેશમાં ર૭ અને ર૮ મે ના કરા પડવાની સંભાવના છે. ઉત્તરાખંડમાં ર૮ મેથી ર જૂન સુધી ભારે વરસાદની ચેતવણી જાહેર કરવામાં આવી છે. રાજસ્થાન અને જમ્મુના કેટલાક વિસ્તારોમાં ર૮ મે ના લૂ (હીટવેવ) ની ચેતવણી પણ આપવામાં આવી છે.

કેરળ અને તટિય કર્ણાટકમાં ર૮ મે થી ર જૂન સુધી ગાજવીજ અને ૪૦-પ૦ કિ.મી. પ્રતિકલાકની ઝડપે ફૂંકાતા ભારે પવન સાથે અતિભારે વરસાદની સંભાવના છે, જ્યારે તમિલનાડુ, પુડુચેરી અને કરાઈકલમાં ર૮ મે થી ર જૂન સુધી સતત ભારેથી અતિભારે વરસાદ સંભવ છે. આંધ્રપ્રદેશ, રાયલસીમા અને તેલંગાણામાં પણ આગામી પાંચ દિવસ સુધી ઝરમર વરસાદ, વાવાઝોડું અને પ૦-૭૦ કિ.મી. કલાકની ઝડપે પહોંચી શકે તેવા તેજ પવન ફૂંકાવાની સંભાવના છે. તેલંગાણામાં ર૮-ર૯ મે ના અતિભારે વરસાદની ચેતવણી આપવામાં આવી છે. ગુજરાતમાં ૭૦ કિ.મી. પ્રતિકલાકની ઝડપે પવન ફૂંકાઈ શકે છે કોંકણ અને પહાડી વિસ્તારોમાં અતિભારે વરસાદની સંભાવના વ્યક્ત કરવામાં આવી છે.

આગામી સાત દિવસ સુધી પૂર્વ-ઉત્તર રાજ્યોમાં હળવાથી મધ્યમ વરસાદ સાથે ગાજવીજ અને વીજળી પડવાની સંભાવના છે. મિઝોરમ (ર૮ મે), આસામ અને મેઘાલય (ર૯-૩૦) મે માટે અતિભારે વરસાદની ચેતવણી જાહેર કરવામાં આવી છે. ઓડિશા, ઝારખંડ, છત્તીસગઢ, પશ્ચિમ બંગાળ અને વિદર્ભમાં ૩૧ મે સુધી વરસાદ અને વાવાઝોડાનું અનુમાન છે. ઓડિશામાં ર૭ અને ર૯ મે ના અતિભારે વરસાદ ખાબકી શકે છે, જ્યારે વિદર્ભ અને પશ્ચિમ બંગાળમાં ર૯-૩૦ મે ના વરસાદની સંભાવના છે.

ઉત્તર ભારતમાં આગામી બે દિવસ સુધી તાપમાનમાં ર-૩ ડીગ્રી સેલ્સિયસનો વધારો અને પછી ૪-પ દિવસમાં ઘટાડો થવાનું અનુમાન છે. મધ્ય ભારતમાં ત્રણ દિવસ સુધી કોઈ ખાસ ફેરફાર જોવા મળશે નહીં. ત્યારપછી તાપમાન ર-૩ ડીગ્રી સુધી વધી શકે છે. પૂર્વ ભારતમાં ૫ાંચ દિવસ સુધી કોઈ મોટો ફેરફાર જોવા મળશે નહીં.

જો આપને આ પોસ્ટ ગમી હોય તો શેર કરો...