પત્રકાર તરીકે ઓળખ આપી રૂ.૩ હજાર પડાવવાના કેસમાં જામીન મંજૂર

Author: નોબત સમાચાર

પત્રકાર તરીકે ઓળખ આપી રૂ.૩ હજાર પડાવવાના કેસમાં જામીન મંજૂર

ફલ્લાના આસામીએ નોંધાવી હતી ફરિયાદઃ

જામનગર તા. ૨૮: જામનગરના ફલ્લામાં આવેલા એક તળાવમાંથી માટી ભરી રહેલા આસામીનો વીડિયો ઉતારી કેટલાક શખ્સોએ પોતાની ઓળખ પત્રકાર તરીકેની આપી રૂ.૩ હજાર પડાવી લીધાની પોલીસમાં ફરિયાદ કરાઈ હતી. તે ગુન્હાના બે આરોપીએ જામીન મુક્ત થવા કરેલી અરજી અદાલતે ગ્રાહ્ય રાખી છે.

જામનગર તાલુકાના ફલ્લા ગામની સીમમાં આવેલા કરારવાળા તળાવથી ઓળખાતી જગ્યામાં ગઈ તા.૨૨-૩-૨૦૨૫ના દિને બકાભાઈ જહાભાઈ બાંભવા જેસીબી મશીનથી ભરતભાઈ દલસાણીયાના ખેતરમાં માટી ભરી રહ્યા હતા.

તે દરમિયાન કોઈ શખ્સો દ્વારા તેનો વીડિયો ઉતારી લીધો હતો અને પોતાની ઓળખ પત્રકાર તરીકેની આપી વીડિયો વાયરલ કરવાનું કહી બળજબરીથી રૂ.૩ હજાર કઢાવી લીધા હતા તે બનાવ અંગે બકાભાઈ બાંભવા દ્વારા પોલીસમાં ફરિયાદ કરાતા પોલીસે પ્રવીણ કરશનભાઈ પરમાર, પૂંજાભાઈ કમાભાઈ ચાવડા વગેરે સામે બીએનએસ કલમ ૩૦૮ (ર) (પ૪) મુજબ ગુન્હો નોંધી આરોપીઓની ધરપકડ કરી હતી.

આરોપી પૈકી પ્રવીણભાઈ પરમાર, પુંજાભાઈ કમાભાઈ ચાવડાએ જામીન મુક્ત થવા અદાલતમાં અરજી કરી હતી. તે અરજી ગ્રાહ્ય રાખી અદાલતે બંને આરોપીને રૂ.૨૫૦૦૦ ના જામીન પર મુક્ત કરવા હુકમ કર્યાે છે. આરોપીઓ તરફથી વકીલ દિવ્યેશ એસ. સીંચ, પરબત વી. મકવાણા રોકાયા હતાં.

જો આપને આ પોસ્ટ ગમી હોય તો શેર કરો...