દાદીને જોવા હોસ્પિટલ આવવાનું કાકાએ કહેતા ભત્રીજા સહિત ચારે કર્યાે હુમલો

Author: નોબત સમાચાર

દાદીને જોવા હોસ્પિટલ આવવાનું કાકાએ કહેતા ભત્રીજા સહિત ચારે કર્યાે હુમલો

મોટા વડાળામાં યુવકને ધોકાવી નખાયાઃ

જામનગર તા. ર૮: જામનગરના એક વૃદ્ધા સારવાર માટે હોસ્પિટલમાં દાખલ કરાતા અને તેમના પુત્રએ ભત્રીજાઓને હોસ્પિટલ આવવાનું કહેતા બે મહિલા અને ભત્રીજાઓએ કાકાને ધોકાવી નાખ્યા હતા. જ્યારે કાલાવડના મોટા વડાળામાં એક યુવાન પર અન્ય સાથે કેમ ફરે છે તેમ કહી હુમલો કરાયો હતો.

જામનગરના સાતરસ્તા નજીક એમપી શાહ કોમર્સ કોલેજ પાછળ જલારામનગર માં રહેતા પ્રકાશભાઈ પોપટભાઈ મગવાનીયા નામના પ્રૌઢ પર ગઈકાલે રાત્રે તેમના ભત્રીજા મનોજ, અનિલ, પૂજા તથા શારદાબેન મગવાનીયાએ હુમલો કર્યાે હતો. તેની ફરિયાદ સિટી બી ડિવિઝનમાં કરાઈ છે.

ફરિયાદમાં જણાવવામાં આવ્યા મુજબ ગઈકાલે રાત્રે પ્રકાશભાઈ તથા તેમના ભાઈ અરવિંદભાઈ, ભાભી મંજુબેન તથા ભત્રીજો વિજય ઘરે હતા ત્યારે તેઓએ પોતાના માતા અને મનોજના દાદીને બીમારી અંગે સારવાર અર્થે જી.જી. હોસ્પિટલમાં દાખલ કરવામાં આવ્યા હોય, થોડીવાર માટે ત્યાં આવવા ફોન કર્યાે હતો. જેમાં મનોજે આવીએ કે ન આવીએ તે નક્કી નહી તેમ કહી ગાળો ભાંડ્યા પછી મનોજ, અનિલ, પૂજા અને શારદાબેન આવી ચડ્યા હતા અને તેઓએ હુમલો કર્યાે હતો મનોજે માથામાં ધોકો ફટકાર્યાે હતો અને અનિલે છરીથી ઈજા કરી હતી. શારદાબેન તથા પૂજાએ ઈંટના ઘા કર્યા હતા. પોલીસે ગુન્હો નોંધી આરોપીઓની શોધખોળ આરંભી છે.

કાલાવડ તાલુકાના મોટા વડાળા ગામના પ્રફુલ ઉર્ફે જીતેશ ધીરજભાઈ વાઘેલા ગઈકાલે સવારે મોટા વડાળા ગામમાં ગ્રામ પંચાયત કચેરી પર હતા ત્યારે ત્યાં અગાઉથી હાજર ઈકબાલ નુરમામદ મોગલ ઉર્ફે રાજુ નામના શખ્સે તું નિકુંજ તથા જીતેશ સાથે કેમ ફરે છે અને મારી ઓફિસે પોલીસ કેમ મોકલે છે તેમ કહી નાક પર ઢીકો મારી પ્રફુલને પછાડી દઈ ઢીકાપાટુથી ઈકબાલે હુમલો કરી માર માર્યાે હતો અને જાનથી મારી નાખવાની ધમકી આપી હતી.

જો આપને આ પોસ્ટ ગમી હોય તો શેર કરો...