ગુડવોટ્સ વેસ્ટ ટુ એનર્જીના પ્લાન્ટમાં તમામ વિગતો જાહેર કરવા રજૂઆત

Author: નોબત સમાચાર

ગુડવોટ્સ વેસ્ટ ટુ એનર્જીના પ્લાન્ટમાં તમામ વિગતો જાહેર કરવા રજૂઆત

તંત્રની શંકાસ્પદ ઢીલી નીતિની ચોમેર ટીકાઃ મુદ્દો 'ટોક ઓફ ધ ટાઉન'

જામનગર તા. ર૩: જામનગરમાં અત્યારે ગુડવોટ્સ વેસ્ટ ટુ એનર્જીના પ્લાન્ટની બંધ થઈ ગયેલી કામગીરી તથા મહાનગરપાલિકા તંત્ર દ્વારા નોટીસો પાઠવવામાં આવતી હોવાનો મુદ્દો ટોક ઓફ ધી ટાઉન બની ગયો છે. આ કંપની સામે મનપા તંત્રની શંકાસ્પદ ઢીલી નીતિ અંગે પણ ચોમેર ટીકા થઈ રહી છે, તેમજ કંપનીના બદલે પ્રજાના નાણા ખર્ચ કરીને હાલ થઈ રહેલી કામગીરીથી પણ અસંતોષ પેદા થયો છે.

આ સંજોગોમાં ન.પ્રા.શિ. સમિતિના પૂર્વ સદસ્ય નીતિનભાઈ માડમે આ કંપની અંગેની તમામ વિગતો કરવા ગુજરાત પ્રદૂષણ નિયંત્રણ બોર્ડને માહિતી અધિકાર નિયમ હેઠળ જાહેર કરવા રજૂઆત કરી છે.

આ રજૂઆતમાં જણાવ્યા પ્રમાણે પ્રદૂષણ નિયંત્રણ બોર્ડ દ્વારા આપવામાં આવેલ મંજુરી-શરતોની વિગતો, અત્યાર સુધી બોર્ડ દ્વારા કરવામાં આવેલ ઈન્સ્પેક્શનની વિગતો પ્લાન્ટને આપવામાં આવેલ નોટીસોની વિગતો સાથેની માહિતી પૂરી પાડવા તેમણે રજૂઆત કરી છે.

આ ઉપરાંત પ્રદૂષણ નિયંત્રણ બોર્ડ દ્વારા જામનગર શહેર, જિલ્લાના ઔદ્યોગિક એકમો, કારખાના, બંદર પર પ્રદૂષણ અંગે કોને-કોને નોટીસો આપી અને શું કાર્યવાહી કરવામાં આવી તેની તમામ વિગતો, જીઆઈડીસી વિસ્તારમાં એસ.પી.ટી. પ્લાન્ટ તથા સોલીડ વેસ્ટ મેનેજમેન્ટના પ્લાન્ટનો અંગે તથા બોર્ડની મંજુરીની વિગતો જાહેર કરવા તેમણે માંગણી કરી છે.

આ ઉપરાંત એક અન્ય પત્ર દ્વારા બેડી ગ્રુપ ઓફ પોર્ટસના બંદરો પર હાલ કોઈ સુએજ ટ્રીટમેન્ટ પ્લાન્ટ કાર્યરત નથી. સોલીડ વેસ્ટ મેનેજમેન્ટની જવાબદારી કોઈપણ એજન્સીને કે કર્મચારીને સોંપાયેલ નથી તેવા પ્રદૂષણ નિયંત્રણ બોર્ડના સત્તાવાર જવાબ અંગે અનેક સવાલો પેદા થયા હોવાનું જણાયું છે.

બંદર ઉપર કાર્ગો હેન્લીંગ સમયે ઘન-પ્રવાહી કચરાના નિકાલની વ્યવસ્થાનો અભાવ છે, ત્યારે આ ટનબંધ કચરાનો નિકાલ કેવી રીતે અને ક્યાં થઈ રહ્યો છે? કચરાનો નિકાલ શું બીનઅધિકૃતરીતે કરવામાં આવી રહ્યો છે? જો આ કચરો દરિયામાં જ ઠાલવી દેવામાં આવતો હોય તો જવાબદારો સામે શા માટે કાર્યવાહી કરવામાં આવતી નથી?

જો આપને આ પોસ્ટ ગમી હોય તો શેર કરો...