કરિયાણાના બાકી પૈસાની ઉઘરાણી કરાતા માતા-પુત્ર પર ત્રણનો હુમલો

Author: નોબત સમાચાર

કરિયાણાના બાકી પૈસાની ઉઘરાણી કરાતા માતા-પુત્ર પર ત્રણનો હુમલો

ગણેશવાસમાં મહિલા પર એક સ્ત્રી સહિત ચાર તૂટી પડ્યાઃ

જામનગર તા. ૨૪: જામનગરની ઈન્દિરા કોલોનીમાં કરિયાણાની દુકાનમાંથી ઉધાર સામાન ખરીદનાર વ્યક્તિ પાસે બાકી પૈસાની ઉઘરાણી કરાતા ત્રણ શખ્સે માતા-પુત્ર પર હુમલો કર્યાે હતો. જ્યારે ગણેશવાસમાં એક મહિલાને ત્રણ શખ્સ તથા એક મહિલાએ ઘર આવી ફટકાર્યા હતા. પોલીસે ગુન્હો નોંધી તપાસ હાથ ધરી છે.

જામનગરની ઈન્દિરા કોલોની શેરી નં.૭માં રહેતા હંસાબેન મહેશભાઈ વઘેરા નામના મહિલાની ત્યાં જ કરિયાણાની દુકાન આવેલી છે. તે દુકાનમાંથી ઈન્દિરા કોલોનીના જતીન વાઘેલા નામના શખ્સે ઉધારમાં સામાન લીધો હતો. તે બાકી રકમની હંસાબેનના પુત્રએ ઉઘરાણી કરતા ઉશ્કેરાયેલા જતીન તેમજ સાહીલ અને બળીયા નામના શખ્સોએ ગઈકાલે રાત્રે હંસાબેનના પુત્ર પર ધોકા, ઢીકાપાટુથી હુમલો કરી માર માર્યાે હતો. આ વેળાએ વચ્ચે પડેલા હંસાબેનને સિમેન્ટનું પતરૂ પગમાં ઝીંકી દેવાયું હતું. સિટી સી ડિવિઝન પોલીસ સ્ટેશનમાં હંસાબેને ફરિયાદ નોંધાવી છે.

જામનગરના કિસાન ચોક વિસ્તાર પાસે કબીર આશ્રમ નજીક ગણેશવાસમાં રહેતા માયાબેન દેવશીભાઈ વિંઝુડા નામના મહિલા ગઈકાલે બપોરે પોતાના ઘરે હતા ત્યારે ખીમીબેન દેવશીભાઈ પરમારે દરવાજો ખખડાવતા માયાબેને દરવાજો ખોલ્યો હતો. તે પછી ખીમીબેન તથા ભરત કમાભાઈ પારીયા, રમેશ કાનજીભાઈ પરમાર, હમીર કાનજીભાઈ પરમારે લાકડાના પાટીયા, ઈંટ વડે હુમલો કરી માર માર્યાે હતો. ગયા સોમવારે પણ રમેશ તથા હમીરે ગાળો ભાંડી ઢીકાપાટુથી માયાબેનને માર મારી જાનથી મારી નાખવાની ધમકી આપી હતી. આ બાબતની સિટી એ ડિવિઝનમાં ફરિયાદ કરાઈ છે.

જો આપને આ પોસ્ટ ગમી હોય તો શેર કરો...