પુત્રવધૂ પાસે વધુ કામ કરાવતા હોવાની શંકા રાખી વેવાઈઓ પર ચાર શખ્સે કર્યાે હુમલો

Author: નોબત સમાચાર

પુત્રવધૂ પાસે વધુ કામ કરાવતા હોવાની શંકા રાખી વેવાઈઓ પર ચાર શખ્સે કર્યાે હુમલો

એક પોલીસકર્મીએ પાઈપ ફટકાર્યાની ફરિયાદઃ

જામનગર તા. ૯: કાલાવડના એક યુવાનના લગ્ન પોલીસ કર્મચારીની ભત્રીજી સાથે કરવામાં આવ્યા પછી તે યુવતી પાસે વધુ કામ કરાવતા હોવાની શંકા રાખી યુવતીના પિતા, પોલીસ કર્મચારી કાકા તથા બે ભાઈએ શુક્રવારે રાત્રે બોલાચાલી કર્યા પછી પોલીસ કર્મચારીએ આ યુવાનના ભાઈના માથામાં પાઈપ ફટકારતા પોલીસમાં ફરિયાદ કરાઈ છે.

કાલાવડ તાલુકાના પ્રભુજી પીપળીયા ગામમાં રહેતા મનસુખભાઈ મૂળજીભાઈ વાઘેલા નામના યુવાનના ભાઈ અને કાલાવડ શહેરના કાશ્મીરપરામાં રહેતા પ્રવીણભાઈ વાઘેલા સાથે રાજકોટ જિલ્લાના ઉપલેટા તાલુકાના ખારસીયા ગામના માધાભાઈ પુંજાભાઈ બગડા નામના વ્યક્તિની પુત્રીના લગ્ન કરવામાં આવ્યા હતા.

તે દરમિયાન શુક્રવારે રાત્રે મનસુખભાઈ તથા પ્રવીણભાઈ પોતાના ઘરે હાજર હતા. ત્યારે માધાભાઈ પુંજાભાઈ બગડા તથા તેમના પુત્ર ધર્મેશ માધાભાઈ બાઈક પર આવ્યા હતા. આ શખ્સોએ અમારી પુત્રી દમયંતી પાસે તમે વધુ કામ કેમ કરાવો છો તેમ કહી બોલાચાલી કર્યા પછી દિનેશ પુંજાભાઈ બગડા નામના પોલીસ કર્મચારી તેમજ રમેશ માધાભાઈ બગડા નામના બે શખ્સ મોટરમાં ઘસી આવ્યા હતા. આ શખ્સોએ પણ તમે દમયંતી પાસે વધુ કામ કરાવો છો તેમ કહી ઝઘડો કરી ગાળો ભાંડયા પછી ઝપાઝપી શરૂ કરી હતી.

આ વેળાએ ઉશ્કેરાઈ ગયેલા પોલીસ કર્મચારી દિનેશ પુંજાભાઈએ પોતાની પાસે રહેલો પાઈપ મનસુખભાઈના માથામાં ફટકારી તેઓને લોહી લોહાણ બનાવી નાખ્યા હતા. કાલાવડની સરકારી હોસ્પિટલમાં ખસેડાયેલા મનસુખભાઈએ કાલાવડ શહેર પોલીસ સ્ટેશનમાં ફરિયાદ નોંધાવી છે. પોલીસે પોલીસકર્મી સહિતના ચારેય સામે ગુન્હો નોંધ્યો છે.

જો આપને આ પોસ્ટ ગમી હોય તો શેર કરો...