ચેક પરતના કેસમાં સજા પડતા પૂર્વ ભાગીદાર તથા તેના પુત્રએ આપી ધમકી

Author: નોબત સમાચાર

ચેક પરતના કેસમાં સજા પડતા પૂર્વ ભાગીદાર તથા તેના પુત્રએ આપી ધમકી

જામનગર તા. પઃ જામનગરના રામેશ્વરનગરમાં રહેતા એક આસામી સાથે કન્સ્ટ્રકશનના ધંધાની ભાગીદારી પૂર્ણ કર્યા પછી પૂર્વ ભાગીદારે ચેક પરતની ફરિયાદ નોંધાવી હતી. તેમાં ગઈકાલે સજા ફટકારવામાં આવતા આ આસામી તથા તેના પુત્રએ પૂર્વ ભાગીદારને રોકી ગાળો ભાંડી ધમકી આપ્યાની પોલીસમાં ફરિયાદ કરવામાં આવી છે.

જામનગરના રામેશ્વરનગર વિસ્તાર પાછળ આવેલી ક્રિષ્ના પાર્ક સોસાયટીમાં રહેતા પ્રવીણભાઈ સામતભાઈ ખોલા તથા રામેશ્વરનગર ચોકમાં રહેતા વિજય ગોવિંદભાઈ આંબલીયા નામના બે આસામીએ અગાઉ ભાગીદારીમાં કન્સ્ટ્રક્શનનો વ્યવસાય શરૂ કર્યાે હતો.

તે પછી બંને વચ્ચે મનદુખ થતાં તેઓએ ભાગીદારી સહમતીથી પુરી કરી હતી જેમાં પ્રવીણભાઈએ પૈસા લેવાના બાકી હતા. તે દરમિયાન વિજય ગોવિંદભાઈ સામે અદાલતમાં ચેક પરતની ફરિયાદ પ્રવીણભાઈએ નોંધાવી હતી. તે કેસના અંતે ગઈકાલે અદાલતે વિજય ગોવિંદભાઈ આંબલીયાને સજા ફટકારી હતી. તેનો ખાર રાખી ગઈકાલે બપોરે વિજય તથા તેનો નાનો પુત્ર રામેશ્વરનગર ચોકમાંથી પ્રવીણભાઈ જ્યારે જતા હતા ત્યારે તેઓને રોકી લઈ ગાળો ભાંડી બંને શખ્સે અહીંથી નીકળતો નહીં જાનથી મારી નાખીશું તેવી ધમકી આપી હતી. પ્રવીણભાઈએ સિટી બી ડિવિઝનમાં ફરિયાદ કરી છે.

જો આપને આ પોસ્ટ ગમી હોય તો શેર કરો...