દ્વારકા જિલ્લામાં ૧પમી ઓગસ્ટ સુધી દરિયા કે ખાડીમાં માછીમારી પર પ્રતિબંધ

Author: નોબત સમાચાર

દ્વારકા જિલ્લામાં ૧પમી ઓગસ્ટ સુધી દરિયા કે ખાડીમાં માછીમારી પર પ્રતિબંધ

ઈન્ચાર્જ જિલ્લા મેજિસ્ટ્રેટનું જાહેરનામુ

ખંભાળીયા તા. ૩ઃ દેવભૂમિ દ્વારકા જિલ્લાના માછીમારોને તા. ૧પ ઓગસ્ટ સુધી દરિયાકાંઠે કે ક્રિક એરિયામાં અવરજવર પર પ્રતિબંધ મૂકતું જાહેરનામું પ્રસિદ્ધ થયું છે.

દેવભૂમિ દ્વારકા જિલ્લાના જુદા-જુદા બંદરોએથી માછીમારી માટે માછીમારો સમુદ્રમાં જાય છે. વાવાઝોડા, વરસાદ કે હવામાન અંગેની અન્ય આગાહીઓ સંબંધે આવા સમુદ્રમાં રહેલ માછીમારોને ચેતવણી પહોંચાડવી શક્ય હોતી નથી. જુન માસથી દરીયો તોફાની થઈ જતો હોવાથી માછીમારોને સામાન્ય રીતે જૂન માસથી સમુદ્રમાં માછીમારી માટે જવું વિશેષ જોખમી છે. મત્સ્યોદ્યોગ ખાતું તથા પોર્ટ ઓફિસર દ્વારા માછીમારોને આવી મોસમમાં સમુદ્રમાં જવા માટે પરવાનગી આપવામાં આવતી નથી. તેમ છતાં અનધિકૃત રીતે કોઈ માછીમાર સમુદ્રમાં ચાલ્યા જાય અને સમુદ્ર તોફાની બને તેવા સંજોગોમાં તેઓને જીવનું જોખમ ઉભું થાય તેવી સંભાવના હોય છે. આથી આવા માછીમારોને સમુદ્રમાં ગેરકાયદેસર રીતે જતા અટકાવવા ઈન્ચાર્જ અધિક જિલ્લા મેજિસ્ટ્રેટ દ્વારા જાહેરનામું બહાર પાડવામાં આવ્યું છે.

આ જાહેરનામા અંતર્ગત કોઈપણ માછીમારોએ કે અન્ય કોઈ વ્યક્તિઓએ તા. ૧-૮-ર૦ર૪ થી તા. ૧પ-૮-ર૦ર૪ દરમિયાન (બન્ને દિવસો સહિત) માછીમારી માટે કે અન્ય કોઈ હેતુસર દેવભૂમિ દ્વારકા જિલ્લાના સમગ્ર વિસ્તારના દરિયાકાંઠેથી કે ક્રિક એરીયા (ખાડી વિસ્તાર) માં જવા તેમજ કોઈપણ બોટની અવરજવર કરવા પર પ્રતિબંધ લગાવ્યો છે. આ આદેશોનું ઉલ્લંઘન કરનાર વ્યક્તિ ભારતીય ન્યાય સંહિતા ર૦ર૩ ની જોગવાઈ અનુસાર સજાને પાત્ર થશે.

આ જાહેરનામું પોર્ટ ઉપર આવતા વ્યાપારીક જહાજો, લશ્કરી દળો, અર્ધલશ્કરી દળો, પોલીસ દળો, ગુજરાત મેરીટાઈમ બોર્ડની બોટ, અજાડ ટાપુ તથા ઓખાથી બેટ દ્વારકા વચ્ચે અવરજવર માટે સક્ષમ અધિકારી દ્વારા અધિકૃત કરેલ પેસેન્જર બોટ, નોન-મોટરાઈઝડ ક્રાફટ (લાકડાની બિન યાંત્રિક એક લકડી હોડી અને શઢવાળી હોડી) તથા પગડીયા માછીમારોને લાગુ પડશે નહીં.

જો આપને આ પોસ્ટ ગમી હોય તો શેર કરો...