ખેતરમાં વાછરડી ઘૂસી જવાના પ્રશ્ને હર્ષદ-ગાંધવીમાં બે જૂથ વચ્ચે બઘડાટી

Author: નોબત સમાચાર

ખેતરમાં વાછરડી ઘૂસી જવાના પ્રશ્ને હર્ષદ-ગાંધવીમાં બે જૂથ વચ્ચે બઘડાટી

બંને પક્ષની ફરિયાદ પરથી પંદર સામે નોંધાયો ગુન્હોઃ

જામનગર તા. ૩ઃ કલ્યાણપુરના ગાંધવીમાં એક ખેતરમાં વાછરડી ઘૂસી જવાના પ્રશ્ને ગુરૂવારે સાંજે બે બાવાજી જૂથ વચ્ચે બઘડાટી બોલી ગઈ હતી. બંને પક્ષે સામસામી ફરિયાદ નોંધાવી છે. પોલીસે કુલ ૧૫ સામે ગુન્હો નોંધ્યો છે. આઠ વ્યક્તિને નાની મોટી ઈજા થવા પામી છે.

દેવભૂમિ દ્વારકા જિલ્લાના કલ્યાણપુર તાલુકાના ગાંધવી, હર્ષદ ગામમાં રહેતા ભૂપતગર રામગર રામદતીના પિતરાઈ સંજયગરની વાછરડી નજીકમાં આવેલા શૈલેષગર બાવનગર મેઘનાથીના ખેતરમાં ઘૂસી જતાં શૈલેષે વાછરડી બાંધી લીધી હતી. તેને છોડાવવા માટે સંજયગરના પત્ની જતાં તેમની સાથે બોલાચાલી કરી અશોક ગર મનસુખગર મેઘનાથીએ ફોન કરી સંજયને કહ્યું. તે પછી ભૂપતગર અને અન્ય વ્યક્તિઓ સમજાવવા જતા શૈલેષ, સુરેશગર, અશોક તથા જગદીશગર રામગર, મનોજગર, મનસુખગર, ભરતગર, પ્રશાંતગર, જયકિશનગર મેઘનાથીએ ધોકા તથા પાઈપ વડે હુમલો કરી માર માર્યાે હતો. ભૂપતગર તથા મુકેશગરને માથામાં ગંભીર ઈજા થઈ છે. તેની ફરિયાદ ભૂપતગરે નોંધાવી છે. તે ફરિયાદની સામે મનોજ ગર બાવનગર મેઘનાથીએ વળતી ફરિયાદ કરી છે. જેમાં તેઓએ જણાવ્યા મુજબ ખેતરમાં વાછરડી ઘૂસી જવાના પ્રશ્ને ઠપકો અપાતા નિકુલ, ભૂપતગર, સંજયગર, મુકેશગર, અજયગર, મયુરગરે પાઈપ, ઢીકાપાટુથી હુમલો કરી માર માર્યાે હતો. હુમલાના આ બનાવમાં બંને પક્ષના કુલ આઠ વ્યક્તિને ઈજા થઈ છે. પોલીસે આ ફરિયાદ પણ રજીસ્ટરે લીધી છે અને કુલ ૧૫ શખ્સ સામે ગુન્હો નોંધ્યો છે.

જો આપને આ પોસ્ટ ગમી હોય તો શેર કરો...