લતીપર પાસે સર્જાયેલા અકસ્માતમાં મોટરચાલક સામે નોંધાવાઈ ફરિયાદ

Author: નોબત સમાચાર

લતીપર પાસે સર્જાયેલા અકસ્માતમાં મોટરચાલક સામે નોંધાવાઈ ફરિયાદ

જામનગર તા.૧૭ : ધ્રોલના લતીપરથી ગોકુલપર ગામ વચ્ચે બુધવારે રાત્રે સર્જાયેલા અકસ્માતમાં ત્રણ યુવાનના મૃત્યુ થયા હતા અને બે યુવાન ઘવાયા હતા. એક લગ્નપ્રસંગમાં દાંડિયારાસ પૂર્ણ કરી આ યુવાનો નાસ્તો કરવા ભેંસદળ ચોકડીએ ગયા હતા ત્યાંથી પરત ફરતી વખતે મોટરે માર્ગમાં ગોથું માર્યું હતું. મોટર ચલાવી રહેલા જામનગરના વિભાપરના યુવાન સામે ગુન્હો નોંધાયો છે.

ધ્રોલથી ટંકારા વચ્ચેના ધોરીમાર્ગ પર બુધવારે રાત્રે દોડી જતી જીજે-૩૬-એસી ૪૯૫૭ નંબરની હ્યુન્ડાઈ કંપનીની વરના મોટર લતીપર થી ગોકુલપર ગામ વચ્ચે ગોથંુ મારી ગઈ હતી. આ અકસ્માતે મૂળ ધ્રોલના લતીપર ગામના વતની અને હાલમાં રાજકોટમાં રહેતા રીશીભાઈ મુકેશભાઈ ચભાડીયા તેમજ જામનગરના વિવેક દિનેશભાઈ પરમાર અને ધર્મેન્દ્રસિંહ રામદેવસિંહ ઝાલા નામના ત્રણ યુવાનના ગંભીર ઈજા થવાથી મૃત્યુ થયા હતા.

આ યુવાનો લતીપર ગામમાં યોજાયેલા લગ્નપ્રસંગે આવ્યા પછી બુધવારે રાત્રે દાંડિયારાસ પૂર્ણ થતાં નાસ્તો કરવા માટે નીકળ્યા હતા. ભેંસદળ ચોકડીએ હોટલમાં નાસ્તો કરી પરત જતી વખતે માર્ગમાં અકસ્માત સર્જાયો હતો. મોટર ચલાવી રહેલા જામનગર નજીકના વિભાપર ગામના જસ્મિન વિઠ્ઠલભાઈ પણસારાએ સ્ટીયરીંગ પરનો કાબુ ગૂમાવતા તેની મોટર ગોથું મારી ગઈ હતી. આ અકસ્માતે જસ્મિન તથા સાથે રહેલા જામનગરના રણજીતસાગર રોડ પર રઘુવીર પાર્કમાં રહેતા હરનીશ રાજેશભાઈ ચભાડીયાને ઈજા થઈ હતી.

અકસ્માતની ધ્રોલ પોલીસ સ્ટેશનમાં હરનીશભાઈએ ફરિયાદ નોંધાવી છે. પોલીસે જસ્મિન પણસારા સામે ગુન્હો નોંધી તપાસ હાથ ધરી છે. આ અકસ્માતમાં હરનીશને નાકમાં ફ્રેક્ચર થયું છે. જ્યારે જસ્મિનનો પણ હાથ ભાંગી ગયો હતો. આ બંને ઈજાગ્રસ્તને સારવાર માટે જામનગર ખસેડાયા હતા.

જો આપને આ પોસ્ટ ગમી હોય તો શેર કરો...