જામનગરમાં લેઉવા પટેલ સમૂહલગ્નોત્સવ અને સન્માન સમારોહ સંપન્નઃ ૧૯ નવદંપતીએ પ્રભુતામાં પગલા માંડ્યા

Author: નોબત સમાચાર

જામનગરમાં લેઉવા પટેલ સમૂહલગ્નોત્સવ અને સન્માન સમારોહ સંપન્નઃ ૧૯ નવદંપતીએ પ્રભુતામાં પગલા માંડ્યા

સમન્વય ટ્રસ્ટ અને સમૂહલગ્ન સમિતિના સંયુકત ઉપક્રમે

જામનગર તા. ર૭: જામનગરમાં તાજેતરમાં શ્રી લેઉવા પટેલ સમન્વય ટ્રસ્ટ-જામનગર તથા શ્રી લેઉવા પટેલ સમૂહલગ્ન સમિતિ-જામનગરના સંયુકત ઉપક્રમે ર૪મો સમૂહલગ્નોત્સવ અને જ્ઞાતિરત્નોના સન્માનનો કાર્યક્રમ શ્રી લેઉવા પટેલ સમન્વય ટ્રસ્ટ સંચાલિત નારણભાઈ માંડાભાઈ વિરાણી સમાજવાડી ખોડલગ્રીન-જામનગરમાં યોજાયો હતો.

તાજેતરમાં તા.૩-પ-ર૪ને શુક્રવારના યોજવામાં આવેલા આ સમૂહલગ્નોત્સવ પૂર્વે તા.ર-પ-ર૪ ના ગુરૂવારે સાંજે દીપ યજ્ઞનું આયોજન અવસરના આંગણે જ થયું અને બહોળી સંખ્યામાં લોકોએ લાભ લીધો હતો. જયાં લગ્ન હિન્દુ શાસ્ત્રોકવિધિથી કરાવવામાં આવ્યા હતાં.

આ પ્રસંગે યોજાયેલ સ્ટેજ કાર્યક્રમની શરૂઆત વિભાપર શિશુ મંદિર વિદ્યાલયની બાળાઓએ રજુ કરેલ ગણેશ વંદનાથી થઈ. આ બાળાઓ દ્વારા અલગ-અલગ ૩ કૃતિઓ રજુ કરવામાં આવી. પધારેલા મહેમાનો અને સમાજ શ્રેષ્ઠીઓનું ખેસપહેરાવી સ્વાગત કરવામાં આવ્યું. પધારેલ મહેમાનો અને સમાજ અગ્રણીઓ દ્વારા એક દીકરી લગ્ન સહયોગી દાતાઓ અને જ્ઞાતિરત્નોનું તેમજ વિવિધ ક્ષેત્રે સારી કામગીરી બજાવી હોય તેવા સેવાભાવી વ્યક્તિઓનું સન્માન કરવામાં આવ્યું હતું. સમૂહલગ્નમાં જોડાયેલા નવદંપતીઓમા સ્વામી વિવેકાનંદ ક્રેડીટ કો-ઓપરેટીવ સોસાયટીમાં સભ્ય હોય તેને એ.ડી. અર્પણ કરીને પ્રોત્સાહિત કરવામાં આવ્યા હતાં.

કુંવરબાઈનું મામેરૂ અને સાત ફેરા સરકારની યોજના અંતર્ગત દરેક કન્યાને રૂ. ર૪,૦૦૦ ની સહાયના ફોર્મ ભરી આપવામાં આવ્યા અને સ્થળ ઉપર મેરેજ સર્ટીફિકેટ પણ આપવામાં આવ્યા. આમંત્રિત મહેમાનો અને સમાજ અગ્રણીઓએ સમૂહ લગ્નના દાતાઓ અને સમાજવાડી બાંધકામના દાતાઓને તથા ભૂમિદાતાઓને બિરદાવ્યા અને આવતા દિવસોમાં સમાજમાંથી કાયમી વધુને વધુ સહકાર આપી આવા સારા કાર્યોમાં જોડાવા અને આ સંસ્થાને મદદરૂપ થવા અપીલ કરી.

તદુપરાંત બ્લડ ડોનેશન કેમ્પ પણ રાખેલો જેમાં પધારેલા સૌ કોઈએ બહોળી સંખ્યામાં રકતદાન કરીને સહકાર આપ્યો. આ પ્રસંગને સફળ બનાવવા બહોળી સંખ્યામાં કાર્યકર્તા ભાઈઓ-બહેનોએ જહેમત ઉઠાવી હતી અને કાર્યક્રમ સુંદર રીતે સંપન્ન થયો હતો. આ સમૂહ લગ્નમાં ૧૯ નવદંપતીઓએ પ્રભુતામાં પગલાં માંડ્યા છે.

જો આપને આ પોસ્ટ ગમી હોય તો શેર કરો...