ભારતીય જનતા પક્ષના રાષ્ટ્રીય સંગઠનમાં ફેરફારના એંધાણઃ ભીખુભાઈ દલસાણિયા મહામંત્રી બનશે?

Author: નોબત સમાચાર

ભારતીય જનતા પક્ષના રાષ્ટ્રીય સંગઠનમાં ફેરફારના એંધાણઃ ભીખુભાઈ દલસાણિયા મહામંત્રી બનશે?

લોકસભાની ચૂંટણી પછી

જામનગર/નવી દિલ્હી તા. રપઃ આજે છઠ્ઠા તબક્કાની લોકસભાની ચૂંટણીનું મતદાન સંપન્ન થઈ જશે અને એક પખવાડિયામાં તો પરિણામો આવ્યા પછી નવી સરકાર પણ રચાઈ ગઈ હશે, તે પછી ભારતીય જનતા પક્ષ રાષ્ટ્રીય કક્ષાએ તથા કેટલાક રાજ્યોમાં પ્રદેશ કક્ષાએ મોટા ફેરફારો કરશે, તેવી સંભાવનાઓ દર્શાવાઈ રહી છે.

ગુજરાતમાં ક્ષત્રિય આંદોલન, હરિયાણામાં આંતરિક અસંતોષ અને આગામી વિધાનસભાની ચૂંટણી ઉપરાંત ઉત્તરપ્રદેશ અને બિહારમાં પણ કેટલાક ઘટનાક્રમોને લઈને વિવિધ રાજ્યોમાં પ્રદેશ કક્ષાએ ગુજરાત સહિત કેટલાક ફેરફારો થશે, અને સી.આર. પાટીલને કેન્દ્રમાં લઈ જવાશે, તેવી અટકળો તેજ બની છે.

રાષ્ટ્રીય કક્ષાએ તો ઘણાં બધા ફેરફારો થઈ શકે છે, પરંતુ ભૂતકાળમાં ગુજરાતમાં પ્રદેશ મહામંત્રી સહિતના હોદ્દાઓ પર કામ કરી ચૂકેલા અને હાલમાં બિહારના પ્રદેશ સંગઠનમાં કાર્યરત ભીખુભાઈ દલસાણિયાને રાષ્ટ્રીય મહામંત્રી બનાવાશે, તેવા સંકેતો મળી રહ્યા હોવાના અહેવાલોની અસર ગુજરાત પ્રદેશ ભાજપના માળખામાં પણ થઈ રહી હોય, તેમ જણાય છે. એવું કહેવાય છે કે આ તમામ પ્રકારના ફેરફારોની પ્રાથમિક વિચારણા થઈ ચૂકી છે, અને ચૂંટણી પછી કેટલાક શિસ્તભંગના પગલાં પણ લેવાઈ શકે છે. જેમાં ખૂલ્લેઆમ કે ગૂપચૂપ પક્ષવિરોધી પ્રવૃત્તિ કરનારા કેટલાક નેતાઓ-કાર્યકરો સામે શિસ્તભંગની કાર્યવાહી થઈ શકે છે.

ભાજપના અંતરંગ વર્તુળોમાં ચાલતી ચર્ચા મુજબ લોકસભાની ચૂંટણીમાં કેટલાક રાજ્યોમાં જાગેલો અસંતોષ તથા ટિકિટ ફાળવણીના મુદ્દે પ્રવર્તમાન જનરલ સેક્રેટરી બી.એલ. સંતોષને લઈને કથિત ફરિયાદો પછી તેના સ્થાને ગુજરાતમાં મોદી મુખ્યમંત્રી હતાં, તે સમયના જુના વફાદાર સાથી અને રાજનીતિના ચાણક્ય ગણાતા ભીખુભાઈ દલસાણિયાને મહામંત્રી બનાવીને ભાજપ પોસ્ટ ઈલેક્શન ડેમેજ કંટ્રોલ કરવાનો પ્રયાસ કરી શકે છે.

બી.એલ. સંતોષ દક્ષિણ ભારતના નેતા છે, અને ત્રણ-ચાર વર્ષથી રાષ્ટ્રીય કક્ષાએ જનરલ સેક્રેટરી છે, તેને બીજી જવાબદારી સોંપીને મૂળ જામનગર જિલ્લાના વતની અને પીઢ રાજનેતા ભીખુભાઈ દલસાણિયા સહિતના કેટલાક નામો રાષ્ટ્રીય કક્ષાએ નવી ટર્મ માટે મહામંત્રીપદ માટે ચર્ચામાં છે, તેમાં દલસાણિયાનું નામ મોખરે હોવાનું કહેવાય છે. જોઈએ, હવે શું થાય છે તે...

જો આપને આ પોસ્ટ ગમી હોય તો શેર કરો...