રોડ રોમિયો તથા લુખ્ખાઓને પાઠ ભણાવવા માટે જિલ્લાભરની પોલીસ સજ્જ

Author: નોબત સમાચાર

રોડ રોમિયો તથા લુખ્ખાઓને પાઠ ભણાવવા માટે જિલ્લાભરની પોલીસ સજ્જ

જિલ્લા પોલીસવડાએ પત્રકારો સાથે કરી વાતચીતઃ

જામનગર તા. ૪: જામનગર શહેર તથા જિલ્લામાં આજથી નવરાત્રિ પર્વની ઉજવણી શરૂ થઈ રહી છે ત્યારે ગઈકાલે પત્રકારો સાથે એક વાતચીતમાં જિલ્લા પોલીસવડાએ કાયદા તથા વ્યવસ્થાની પરિસ્થિતિ અંગે ચીતાર આપ્યો હતો. રોમિયોને પાઠ ભણાવવા તથા મહિલાઓની સુરક્ષા માટે ખાસ વ્યવસ્થા ગોઠવવામાં આવી છે. પોલીસ ફાયર સેફટી સહિતની બાબતો પર પણ નજર રાખશે.

જામનગર શહેર તથા જિલ્લામાં આજથી પ્રાચીન તથા અર્વાચીન ગરમીઓની શરૂઆત કરવામાં આવશે. સતત નવ-દસ દિવસો સુધી પ્રાચીન ગરબીઓમાં માતાજીની આરાધના કરાશે અને યુવાધન અર્વાચીન દાંડીયાની રમઝટ બોલાવશે. આ દિવસો દરમિયાન તમામ પોલીસ અધિકારીઓ ખડેપગે રહી સુરક્ષા તથા કાયદો વ્યવસ્થાની પરિસ્થિતિ પર ચાંપતી નજર રાખશે તેમ ગઈકાલે જિલ્લા પોલીસવડા પ્રેમસુખ ડેલુએ પત્રકારો સાથેની વાતચીતમાં જણાવ્યું હતું.

એસપીએ જણાવ્યા મુજબ તમામ પંડાલો પર ફાયર સેફટીની વ્યવસ્થા સહિતની બાબતો પીઆઈ કક્ષાના અધિકારીઓ ચકાસશે. મહિલાઓની સુરક્ષા માટે ખાસ પેટ્રોલીંગ વ્યવસ્થા કરવામાં આવી છે. કોઈપણ મુશ્કેલીમાં પોલીસનો ૧૦૦ નંબર પર સંપર્ક કરી શકાશે તે માટે ખાસ કંટ્રોલ રૂમ ઉભો કરવામાં આવી રહ્યો છે. છેડતી કે કોઈપણ પ્રકારના અનિચ્છનીય બનાવ વખતે તરત જ પોલીસ મદદમાં આવી જશે.

તે ઉપરાંત પ્રાચીન કે અર્વાચીન ગરબાના સ્થળે જવા માટેના રોડ પર અંધારૂ હશે તો તે માટે પોલીસ દ્વારા આ સ્થળે ખાસ સુરક્ષા વ્યવસ્થા ગોઠવવામાં આવી છે. ગરબાના સ્થળોએ સિવિલ ડ્રેસમાં પોલીસ કર્મચારીઓ ઉપસ્થિત રહી સીન જમાવતા તત્ત્વોને કાયદાનો પાઠ ભણાવવા માટે કટિબદ્ધ છે, મહિલા-યુવતીની સુરક્ષા માટે પોલીસની શી ટીમ કાર્યરત છે.

ગરબાના સ્થળો કે રોડ પર આંટાફેરા કરી સીન નાખતા તત્ત્વો માટે એલસીબી, એસઓજી, જે તે ડિવિઝનના પોલીસ અધિકારીઓ અને સ્ટાફ દ્વારા ચાંપતી નજર રાખવામાં આવી રહી છે. જામનગર શહેર તથા જિલ્લાના નાગરિકો શાંતિપૂર્ણ રીતે નવરાત્રિની ઉજવણી કરી શકે તે માટે પોલીસ વ્યવસ્થા ગોઠવી રહી છે. મોડીરાત્રે પણ લોકોને જરૂરિયાતનો સામાન મળી શકે તે માટે વેપારીઓને પણ કોઈ હેરાનગતિ ન થાય તે રીતે જિલ્લા પોલીસવડા પોતે જ તેના પર નજર રાખશે.

જો આપને આ પોસ્ટ ગમી હોય તો શેર કરો...