રિલાયન્સ પરિવારના રાધિકા મર્ચન્ટ અંબાણી ઈટ્રાની મુલાકાતેઃ આયુર્વેદિક પ્રવૃત્તિઓ નિહાળી

Author: નોબત સમાચાર

રિલાયન્સ પરિવારના રાધિકા મર્ચન્ટ અંબાણી ઈટ્રાની મુલાકાતેઃ આયુર્વેદિક પ્રવૃત્તિઓ નિહાળી

શિક્ષણ- સંશોધન, નિદાન-ઉપચાર અને ઔષધિય વનસ્પતિઓની વિસ્તૃત માહિતી મેળવી

રાધિકા અંબાણીએ આઈટીઆરએના વિવિધ વિભાગમાં મુલાકાત કરી હતી અને ત્યાં ચાલી રહેલા શિક્ષણ અને સંશોધન કાર્યો વિશે માહિતી પ્રાપ્ત કરી હતી. તેમને આયુર્વેદના વિવિધ પાસાઓ જેવા કે નિદાન પદ્ધતિ, ઔષધિય વનસ્પતિઓનો ઉપયોગ, લેબોરેટરીની કામગીરી અને પરંપરાગત ઉપચાર વિશે જાણકારી મેળવી, સંસ્થાના નિયામક પ્રો. ડો. તનુજા નેસરી સાથે નિષ્ણાત ડોક્ટરો અને અધિકારીઓની એક ટીમ આ મુલાકાત દરમિયાન રાધિકા અંબાણી સાથે જોડાઈ હતી અને આઈટીઆરએમાં ઉપલબ્ધ વિવિધ ચિકિત્સા પદ્ધતિઓ વિશે વિગતવાર માહિતી આપી હતી. ઉલ્લેખનીય છે કે ઇન્સ્ટિટ્યૂટ ઓફ ટીચિંગ એન્ડ રિસર્ચ ઇન આયુર્વેદ, જામનગર એ આયુષ મંત્રાલય દ્વારા સ્થાપિત દેશની રાષ્ટ્રીય મહત્ત્વનો દરજ્જો ધરાવતી સૌ પ્રથમ સંસ્થા છે. આ સંસ્થાનો મુખ્ય ઉદ્દેશ આયુર્વેદના ક્ષેત્રમાં શિક્ષણ અને સંશોધન કાર્યને વેગ આપી પ્રોત્સાહન આપવાનો છે. સંસ્થા દ્વારા વિવિધ અંડરગ્રેજ્યુએટ, પોસ્ટગ્રેજ્યુએટ, ડિપ્લોમા અને ડોક્ટરેટ સ્તરના અભ્યાસક્રમો ચલાવવામાં આવે છે. આ ઉપરાંત, આઈટીઆરએ આયુર્વેદના પરંપરાગત જ્ઞાનને આધુનિક વિજ્ઞાન સાથે જોડીને સંશોધન કાર્ય પણ કરે છે. રાધિકા અંબાણીની આ મુલાકાત આયુર્વેદ પ્રત્યેની તેમની ઊંડી રુચિ પ્રદર્શિત કરે છે. તેમના આ પ્રકારે સંસ્થાની મુલાકાત લેવાથી આયુર્વેદના વધતાં વૈશ્વિક મહત્ત્વ અને સ્વીકૃતિને પ્રોત્સાહન મળશે. આ મુલાકાત દરમિયાન રાધિકા અંબાણીએ સંસ્થાના ડોક્ટરો અને અધિકારીઓ સાથે આયુર્વેદના ભવિષ્ય અને તેના વિકાસની સંભાવનાઓ વિશે પણ ચર્ચા કરી હતી. સંસ્થાના ડિરેક્ટર અન્ય વરિષ્ઠ અધ્યાપકોએ તેમનું શુભેચ્છા ભેટ સાથે સ્વાગત કર્યું હતું અને સંસ્થાની પ્રવૃત્તિઓ વિશે માહિતી આપી હતી. રાધિકા અંબાણીએ આઈટીઆરએ દ્વારા કરવામાં આવી રહેલા ઉચ્ચ સ્તરના સંશોધન અને શિક્ષણ કાર્યની પ્રશંસા કરી હતી. આ મુલાકાત ઇન્સ્ટિટ્યૂટ ઓફ ટીચિંગ એન્ડ રિસર્ચ ઈન આયુર્વેદ - (આઈટીઆરએ) માટે એક મહત્ત્વપૂર્ણ પ્રસંગ હતો.

જો આપને આ પોસ્ટ ગમી હોય તો શેર કરો...