પુત્ર સાથે ઝઘડો ન કરવાનું કહેવા ગયેલા પિતા પર બેડીમાં છરીથી હુમલો

Author: નોબત સમાચાર

પુત્ર સાથે ઝઘડો ન કરવાનું કહેવા ગયેલા પિતા પર બેડીમાં છરીથી હુમલો

સમાધાન માટે એકઠા થયા પછી બે ભાઈને માર પડ્યોઃ

જામનગર તા. ૧૨: જામનગરની પટેલ કોલોનીમાં એક યુવાન તેના મિત્રને મળવા જતાં બે શખ્સે તેને ધમકાવ્યો હતો. જ્યારે બેડીમાં પુત્રને ગાળો ભાંડતા ત્રણ શખ્સને સમજાવવા ગયેલા પ્રૌઢ પર છરીથી હુમલો કરાયો હતો. સમાધાનની વાત કરવા એકઠા થયેલા ચાર શખ્સે બે ભાઈને લમધારી નાખ્યા હતા.

જામનગરના પટેલ કોલોની વિસ્તારની શેરી નં.૬માં રહેતા જીત શૈલેષભાઈ ભોજાણી મંગળવારે રાત્રે પટેલ કોલોની શેરી નં.પમાં પોતાના મિત્રને મળવા માટે ગયા હતા ત્યારે ધર્મરાજ નામના શખ્સે અહીં ના પાડી છે તો પણ કેમ આવ્યો? તેમ કહી ગાળો ભાંડી જીતના ચશ્મા ઉતારી લઈ ધક્કો માર્યાે હતો. તે પછી કુલદીપ નામના શખ્સે આવી સામે કેમ બોલે છે તેમ કહી હાથ-પગ ભાંગી નાખવાની ધમકી આપી મારી નાખવાની ધમકી પણ ઠપકારતા જીત ભોજાણીએ પોલીસમાં ફરિયાદ નોંધાવી છે.

જામનગરના બેડી વિસ્તારમાં ઈદ મસ્જિદ રોડ પર રહેતા હુસેન વલીમામદ જેડાના પુત્રને ગઈ રાત્રે જાફર અબ્દુલ ખત્રી, કાસમ અબ્દુલ તથા સલીમ અબ્દુલ ખત્રી નામના ત્રણ શખ્સ ગાળો ભાંડતા હતા. તેઓને હુસેને ઝઘડો કરવાની ના પાડતા ઉશ્કેરાયેલા જાફરે છરીથી હુસેનના પુત્ર પર હુમલો કર્યાે હતો અને કાસમ તથા સલીમે ઢીકાપાટુથી માર માર્યાે હતો. આ વેળાએ હુસેનભાઈ વચ્ચે પડી પોતાના પુત્રને છોડાવતા હતા ત્યારે હમીદ હુસેન ખત્રી અને સલમાન અબ્દુલ ખત્રી પણ આવ્યા હતા. આ શખ્સોએ છરીથી હુસેનભાઈ પર હુમલો કરી પિતા-પુત્રને પતાવી દેવાની ધમકી આપી હતી.

જામનગરના રણજીત સાગર રોડ પર નંદનવન પાર્કમાં રહેતા લાલજી મઘાભાઈ સોલંકી અને તેના ભાઈ જયેશ પર મંગળવારની રાત્રે ધોકા, ઢીકાપાટુથી હરીશ સવજી સોલંકી, નરશી રાજા, મનજી નરશી, દેવા નરશી સોલંકીએ હુમલો કરી ગાળો ભાંડી હતી. અગાઉ હરીશ સવજી સાથે થયેલી માથાકૂટના સમાધાન માટે લાલજી અને જયેશ ગયા હતા ત્યારે ઉપરોક્ત વ્યક્તિઓ ધોકા સાથે આવ્યા હતા અને માર માર્યાે હતો. નરશીએ ધમકી આપી હતી.

જો આપને આ પોસ્ટ ગમી હોય તો શેર કરો...