નવાગામ ઘેડમાં પરિણીતાને આત્મહત્યાની દુષ્પ્રેરણા આપ્યાની સસરાએ નોંધાવી ફરિયાદ

Author: નોબત સમાચાર

નવાગામ ઘેડમાં પરિણીતાને આત્મહત્યાની દુષ્પ્રેરણા આપ્યાની સસરાએ નોંધાવી ફરિયાદ

ત્રણ મહિના પહેલાં મહિલાએ ખાધો હતો ગળાફાંસોઃ

જામનગર તા. ૨૩: જામનગરના નવાગામ ઘેડ વિસ્તારમાં રહેતા કુંભાર પરિણીતાએ ત્રણ મહિના પહેલા પોતાના ઘરના ધાબા પર જઈ હુંકમાં દુપટ્ટા વડે ગાળિયો બનાવી ગળાફાંસો ખાઈ લીધો હતો. તે પછી આ મહિલાના ખંભાળિયામાં રહેતા પિતાએ જમાઈ સામે આત્મહત્યાની દુષ્પ્રેરણા આપવા અંગે ફરિયાદ નોંધાવી છે. ખર્ચાના પૈસા ન આપી કેમ ધૂણે છે તેમ કહી મારકૂટ કરતા પતિએ દહેજની પણ માગણી કરતા આ પરિણીતાએ ગળાફાંસો ખાધો હોવાનું ફરિયાદમાં જણાવાયું છે.

જામનગરના નવાગામ ઘેડ વિસ્તારમાં આવેલી બી.એન. ઝાલા સ્કૂલ પાછળ વસવાટ કરતા પ્રશાંતભાઈ કિશોરભાઈ સંચાણીયા નામના પ્રજાપતિ યુવાનના પત્ની અંકિતાબેન (ઉ.વ.૨૪) ગઈ તા.૮-૪ની સાંજે પોતાના ઘરે હતા. ત્યારે કોઈ અકળ કારણથી આત્મહત્યા કરી લેવાનો કઠોર નિર્ણય કરી મકાનની છત પર જઈ ત્યાં આવેલા હુંકમાં દુપટ્ટા વડે ગળાફાંસો ખાઈ લીધો હતો. જેની પતિને જાણ થતાં તેઓએ અંકિતાબેનને નીચે ઉતારી ૧૦૮ને કોલ કર્યાે હતો. દોડી આવેલી એમ્બ્યુલન્સના સ્ટાફે આ પરિણીતાને ચકાસ્યા પછી મૃત્યુ પામેલા જાહેર કરતા પોલીસને જાણ કરાઈ હતી.

તે દરમિયાન દ્વારકા જિલ્લાના ખંભાળિયા શહેરમાં કુંભારપાડામાં રહેતા ચંદ્રેશભાઈ ધીરજલાલ વસવેલીયાએ ગઈકાલે સિટી બી ડિવિઝન પોલીસ સ્ટેશનમાં જમાઈ પ્રશાંત સંચાણીયા સામે ફરિયાદ નોંધાવી છે. જેમાં તેઓએ જણાવ્યા મુજબ તેમની પુત્રીને પતિ પ્રશાંત અવાર નવાર હેરાન પરેશાન કરી મારકૂટ કરતો હતો અને પત્ની કયાંય બહાર જાય તો ખર્ચા માટે પૈસા પણ આપતો ન હતો.

તે ઉપરાંત અંકિતાબેન ઘરમાં ભરતગુંથણનું કામ કરી પૈસા કમાતા હતા. તે પૈસા પણ વાપરી નાખશ અને તું માનસિક છો તેમ કહી કેમ ધૂણે છે, માવતરેથી પૈસા તથા બાઈક લઈ આવવા પણ પતિ પ્રશાંત દબાણ કરતો હતો તેના કારણે કંટાળી ગયેલા ચંદ્રેશભાઈના પુત્રીએ ગળાફાંસો ખાઈ લીધો હતો. આ ફરિયાદ પરથી પોલીસે આત્મહત્યાની દુષ્પ્રેરણા આપવા અંગે પ્રશાંત કિશોરભાઈ સંચાણીયા સામે ગુન્હો નોંધ્યો છે.

જો આપને આ પોસ્ટ ગમી હોય તો શેર કરો...