ખંભાળિયા-દ્વારકા ધોરીમાર્ગ પર હંજડાપર ગામ નજીક બે મોટર ટકરાઈ પડતા દસ વ્યક્તિને ઈજા

Author: નોબત સમાચાર

ખંભાળિયા-દ્વારકા ધોરીમાર્ગ પર હંજડાપર ગામ નજીક બે મોટર ટકરાઈ પડતા દસ વ્યક્તિને ઈજા

ઈજાગ્રસ્તોને ખંભાળિયા દવાખાને ખસેડાયાઃ એકની હાલત ગંભીર ગણાવાઈઃ

ખંભાળિયા તા. ૧૯: ખંભાળિયા-દ્વારકા ધોરીમાર્ગ પર હાબરડીથી હંજડાપર ગામ વચ્ચે આજે સવારે ક્રેટા તથા વેગનઆર મોટર ધડાકા ભેર અથડાઈ પડ્યા હતા. આ અકસ્માતમાં દસ જેટલા વ્યક્તિને નાની મોટી ઈજા થઈ છે. એકની હાલત ગંભીર ગણાવાઈ રહી છે. દોડી આવેલી એમ્બ્યુલન્સમાં ઈજાગ્રસ્તોને ખંંભાળિયા દવાખાને ખસેડવામાં આવ્યા છે. દ્વારકાથી દર્શન કરીને રાજસ્થાન પરત જતો પરિવાર તથા સ્થાનિક લોકો ની મોટર અકસ્માતનો ભોગ બની છે.

ખંભાળિયાથી દ્વારકા વચ્ચેના ધોરીમાર્ગ પર આવેલા હાબરડીથી હંજડાપર ગામ વચ્ચે આજે સવારે અગિયારેક વાગ્યે જીજે-૧૮-ઈસી ૬૪૬૭ નંબરની હ્યુન્ડાઈ કંપનીની ક્રેટા મોટર તથા સામેથી આવતી સફેદ રંગની મારૂતી સુઝુકી કંપનીની વેગનઆર મોટર વચ્ચે ધડાકાભેર અકસ્માત સર્જાયો હતો.

આ બંને મોટરમાં જઈ રહેલા દસેક વ્યક્તિઓને નાની મોટી ઈજા થઈ હતી. અકસ્માતના સ્થળે હાજર લોકો દોડી આવ્યા હતા. તેઓએ મોટરમાંથી ઈજા ગ્રસ્તોને બહાર કાઢવાની કામગીરી શરૂ કરવા ઉપરાંત ૧૦૮ને કોલ કરતા એમ્બ્યુલન્સ દોડી આવી હતી. તેમાં ઈજાગ્રસ્તોને સારવાર માટે ખંભાળિયા દવાખાને ખસેડવામાં આવ્યા હતા. ઈજાગ્રસ્તોમાંથી એક વ્યક્તિની હાલત ગંભીર ગણાવાઈ રહી છે.

વધુમાં જાણવા મળ્યા મુજબ એક મોટરમાં સ્થાનિક લોકો મુસાફરી કરી રહ્યા હતા જ્યારે બીજી મોટરમાં રાજસ્થાનનો પરિવાર દ્વારકાથી દર્શન કરીને પરત જતો હતો ત્યારે હંજડાપર પાસે અકસ્માત સર્જાઈ ગયો હતો. અકસ્માત પછી બંને મોટર એક-બીજામાં ઘૂસી ગયેલી જોવા મળી હતી. બંને મોટરમાં ખાસ્સુ નુકસાન થવા પામ્યું છે. બનાવની જાણ થતાં પોલીસ કાફલો પણ ધસી આવ્યો હતો.

જો આપને આ પોસ્ટ ગમી હોય તો શેર કરો...