કાશ્મીરમાં લઘુતમ તાપમાન માયનસ ૫ ડીગ્રીઃ ઉ.ભારતમાં તીવ્ર ઠંડી

Author: નોબત સમાચાર

કાશ્મીરમાં લઘુતમ તાપમાન માયનસ ૫ ડીગ્રીઃ ઉ.ભારતમાં તીવ્ર ઠંડી

ગઈકાલે ૫ુડુચેરી-કરાઈકલમાં ભારે વરસાદ પડયો હતો

નવી દિલ્હી તા. ૨૫: ભારતમાં ઠંડીનું મોજું વધુ તીવ્ર બન્યું છે. કાશ્મીરમાં લઘુતમ તાપમાન માઈનસ ૫ ડિગ્રી સુધી નીચે ઉતર્યું છે. પંજાબ અને હરિયાણામાં પણ તીવ્ર ઠંડીનો પ્રકોપ શરૂ થઈ ગયો છે. ગઈકાલ પુડુચેરી અને કરાઈકલમાં ભારે વરસાદ પડયો હતો.

ઉત્તર ભારત હવે ઠંડીની ઝપેટમાં આવી ગયું છે. કાશ્મીર ખીણમાં ઘણી જગ્યાએ લઘુત્તમ તાપમાન શૂન્યથી નીચે પહોંચી ગયું છે. પંજાબમાં કેટલાક સ્થળોએ પારો પણ પાંચ ડિગ્રી સેલ્સિયસથી નીચે જઈ રહૃાો છે. દરમિયાન, બંગાળની ખાડીમાં ઓછા દબાણવાળા ક્ષેત્રને કારણે, દક્ષિણ ભારતના ત્રણ રાજ્યો અને તમિલનાડુ સહિત એક કેન્દ્રશાસિત પ્રદેશમાં વરસાદ ચાલુ છે.

ભારે વરસાદને કારણે કેટલાક દરિયાકાંઠાના જિલ્લાઓ માટે ઓરેન્જ અને અન્ય માટે યેલો એલર્ટ જારી કરવામાં આવી છે. કેન્દ્રશાસિત પ્રદેશ જમ્મુ અને કાશ્મીરની ઉનાળાની રાજધાની શ્રીનગરમાં રવિવારે રાત્રે સિઝનની સૌથી ઠંડી રાતનો અનુભવ થયો, તાપમાન માઈનસ ૩.૨ ડિગ્રી સેલ્સિયસ સુધી ઘટી ગયું. કાશ્મીર ખીણમાં શોપિયા સૌથી ઠંડુ રહૃાું જ્યાં તાપમાન માઈનસ ૫.૧ ડિગ્રી સેલ્સિયસ હતું. પુલવામામાં લઘુત્તમ તાપમાન માઈનસ પાંચ ડિગ્રી સેલ્સિયસ હતું, જ્યારે અનંતનાગમાં માઈનસ ચાર ડિગ્રી સેલ્સિયસ અને ઉત્તર કાશ્મીરના ગુલમર્ગમાં માઈનસ ૧.૯ ડિગ્રી સેલ્સિયસ નોંધાયું હતું.

કાશ્મીરને લદ્દાખ સાથે જોડતા ઝોજિલા પાસ પર પારો માઈનસ ૧૬ ડિગ્રી સેલ્સિયસ સુધી ઘટી ગયો હતો. પંજાબ અને હરિયાણામાં પણ તીવ્ર ઠંડીનો પ્રકોપ શરૂ થઈ ગયો છે. સોમવારે પંજાબના ફરીદકોટમાં સૌથી ઓછું તાપમાન ૪.૪ ડિગ્રી સેલ્સિયસ નોંધાયું હતું. રવિવારે ફરીદકોટ સાત ડિગ્રી તાપમાન સાથે રાજ્યનું સૌથી ઠંડુ સ્થળ રહૃાું. હરિયાણામાં, નારનૌલ સૌથી ઠંડુ સ્થળ હતું જ્યાં લઘુત્તમ તાપમાન ૭.૮ ડિગ્રી સેલ્સિયસ હતું.

બંને રાજ્યો અને કેન્દ્રશાસિત પ્રદેશની સંયુક્ત રાજધાની ચંદીગઢમાં લઘુત્તમ તાપમાન ૬.૪ ડિગ્રી સેલ્સિયસ નોંધાયું હતું, જ્યારે ભટિડામાં પણ સમાન તાપમાન નોંધાયું હતું. હવામાન વિભાગે આગામી બે દિવસમાં પશ્ચિમ બંગાળના લગભગ તમામ જિલ્લાઓમાં લઘુત્તમ તાપમાનમાં બે ડિગ્રી સુધીનો ઘટાડો થવાની આગાહી કરી છે. ત્યારબાદ તાપમાન બે ડિગ્રી સુધી વધવાની ધારણા છે.

દરમિયાન, પશ્ચિમ બંગાળમાં આગામી સાત દિવસ સુધી હવામાન શુષ્ક રહેવાની ધારણા છે. સોમવારે દાર્જિલિગ રાજ્યનું સૌથી ઠંડુ સ્થળ હતું, જ્યાં લઘુત્તમ તાપમાન ૫.૮ ડિગ્રી સેલ્સિયસ હતું. ગઈકાલે પુડુચેરી અને કરાઈકલમાં ભારે વરસાદ પડ્યો હતો કારણ કે બંગાળની ખાડીમાં એક નીચા દબાણવાળા વિસ્તારે ડિપ્રેશનમાં પરિણમ્યું હતું, જેના કારણે સામાન્ય જનજીવન ભારે ખોરવાઈ ગયું હતું. શાળાઓ અને કોલેજો બંધ રાખવામાં આવી હતી.

તમિલનાડુના દરિયાકાંઠાના જિલ્લાઓમાં ભારે વરસાદની આગાહી છે. હવામાન વિભાગે ઓરેંજ અને યલો ચેતવણીઓ જારી કરી છે. કેટલાક જિલ્લાઓમાં ભારે પવન અને વીજળી પડવાની પણ આગાહી છે. કેરળના સાત જિલ્લાઓમાં યલો એલર્ટ વચ્ચે ભારે વરસાદ પડ્યો હતો.

જો આપને આ પોસ્ટ ગમી હોય તો શેર કરો...