Author: નોબત સમાચાર
રમતા રમતા તળાવમાં લપસી પડેલી બાળકીનું મૃત્યુઃ વૃદ્ધાને વીજ આંચકો
બાલવા ગામના યુવાનનું ઝેરી દવા પી લેતાં મૃત્યુઃ
જામનગર તા. ૧૧: કાલાવડના પીપર ગામમાં એક ખેતરમાં મજૂરીકામ કરતા પરપ્રાંતિય શ્રમિકની દોેઢ વર્ષની પુત્રી ગઈકાલે રમતા રમતા તળાવમાં પડી જતાં તેણીનું મૃત્યુ થયું છે. જામજોધપુરના બાલવા ગામના યુવાને ઝેરી દવા પી લીધા પછી તેઓનું પણ સારવારમાં મૃત્યુ નિપજ્યું છે. ઉપરાંત ભાણવડમાં એક વૃદ્ધાને કોઈ રીતે વીજ આંચકો લાગતા તેમના પર કાળનો પંજો પડ્યો છે.
કાલાવડ તાલુકાના પીપર ગામમાં આવેલા કલ્પેશ પટેલ નામના ખેડૂતના ખેતરમાં મજૂરી કામ માટે આવીને રહેતા મૂળ મધ્યપ્રદેશના ધાર જિલ્લાના આંબા કુંજા ગામના ભાવેશ લીમજીભાઈ ડાભી નામના પરપ્રાંતિય શ્રમિકની દોઢ વર્ષની પુત્રી નિશા ગઈકાલે બપોર પછી પોતાના પિતા જ્યારે ખેતરમાં કામ કરતા હતા ત્યારે બાજુમાં આવેલા તળાવના કાંઠા પાસે રમતી હતી.
રમતા રમતા આ બાળકીનો પગ લપસી જતાં તેણી તળાવમાં ખાબકી ગઈ હતી. પાણીમાં કંઈક પડ્યું હોવાનો અવાજ આવતા પિતા સહિતના વ્યક્તિઓ દોડી આવ્યા હતા. તેઓએ નિશાને ડૂબતી જોઈ તેણીને તરત બહાર કાઢી લીધી હતી અને સારવાર માટે ખસેડવાની તજવીજ કરી હતી. આ બાળકીનું સારવાર દરમિયાન મૃત્યુ નિપજ્યું છે. ભાવેશ ડાભીએ કાલાવડ ગ્રામ્ય પોલીસને તેની જાણ કરી છે. જમાદાર આર.વી. ગોહિલે અપમૃત્યુ અંગે નોંધ કરી આગળની કાર્યવાહી કરી છે.
જામજોધપુર તાલુકાના બાલવા ગામમાં રહેતા કમલેશભાઈ જમનભાઈ ચુડાસમા (ઉ.વ.પર)એ ગઈકાલે સાંજે પોતાના ઘરે કોઈ અકળ કારણથી ઝેરી દવા ગટગટાવી લીધી હતી. સારવારમાં ખસેડવામાં આવેલા કમલેશભાઈનું મૃત્યુ થયું છે. તેમના પિતા જમનભાઈ ખીમજીભાઈ ચુડાસમાએ પોલીસને જાણ કરી છે. જમાદાર પી.બી. ખોલાએ આત્મહત્યાનું કારણ જાણવા તપાસ શરૂ કરી છે.
દેવભૂમિ દ્વારકા જિલ્લાના ભાણવડમાં બાપુની વાવ પાછળ રહેતા રાંભીબેન કાનાભાઈ સોલંકી નામના ૬૦ વર્ષના વૃદ્ધા ગઈકાલે સાંજે પોતાના ઘરે હતા ત્યારે તેઓને કોઈ રીતે વીજ આંચકો લાગતા તેમનું મૃત્યુ થયું છે. પુત્ર રામભાઈએ પોલીસને જાણ કરી છે.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
