જામનગરમાં રેલવે સ્ટેશન પાસે અમુક રીક્ષા ચાલકોએ ભાડાની લૂંટ ચલાવી

Author: નોબત સમાચાર

જામનગરમાં રેલવે સ્ટેશન પાસે અમુક રીક્ષા ચાલકોએ ભાડાની લૂંટ ચલાવી

આફતને અવસર બનાવી

જામનગર તા. ૩૦: જામનગરમાં બે-ત્રણ દિવસમાં ભારેથી અતિ ભારે વરસાદ થયો હતો. પરિણામે શહેરની હાલત બગડી જવા પામી છે. અનેક સંસ્થાઓ, સેવાભાવીઓ દ્વારા લોકોને ભોજન માટે ફૂડ પેકેટની મદદ કરવામાં આવી હતી, તો બીજી તરફ કેટલાક રીક્ષા ચાલકોએ આફતને અવસરમાં ફેરવી નાખી અને ભાડાના નામે રીતસર લૂંટ ચલાવી હતી. આવા ગણ્યા-ગાંઠ્યા તકવાદીના કારણે અન્ય સારા લોકો પણ બદનામ થાય છે.

બે દિવસ પહેલા ભારે વરસાદના કારણે જનજીવન અસ્તવ્યસ્ત બન્યું હતું. ચોતરફ પાણી ભરાયા હતાં. બીજી તરફ અનેક લોકો પાણીમાં ફસાયા હોવાથી અસંખ્ય લોકોએ તેમને મદદ કરી હતી અને ફૂડ પેકેટ બનાવી તેનું વિતરણ કરી માનવતા મહેકાવી હતી.

બીજી તરફ કેટલીક ટ્રેનો મોડી રાત્રે રેલવે સ્ટેશન આવી હતી. ત્યારે મુસાફરોને ઘરે જવા રીક્ષાની સંખ્યા પૂરતા પ્રમાણમાં ન હતી અને અમુક રીક્ષા ચાલકોએ રપ૦ થી ૩૦૦ રૂપિયા જેટલું તગડું ભાડું તદ્દન નજીકના વિસ્તાર સુધી જવા માટે વસુલ્યુ હતું. આમ રીતસર આફતનોે લાભ લઈને લૂંટ ચલાવાઈ હતી તો રાબેતા મુજબ મુસાફરોની સેવા માટે રેલવે પોલીસના જવાનો પણ ત્યાં હાજર હતા નહીં. અમુક મુસાફરોના જણાવ્યા મુજબ શરૂસેકશન, પંચવટી, સાત, રસ્તા સુધીની મુસાફરી માટે ર૦૦ થી ૪૦૦ સુધી ભાડું વસુલવામાં આવ્યું હતું. હકિકતે આવા તકવાદીઓને શરમ આવવી જોઈએ. જ્યારે લોકોને મદદની જરૂર હોય ત્યારે તેને લુંટવા એ કેટલું વ્યાજબી છે ?

જો આપને આ પોસ્ટ ગમી હોય તો શેર કરો...