ધરારથી મકાન વેચી દેવા કહી મહિલા તથા તેની ત્રણ પુત્રી પર કરાયો હુમલો

Author: નોબત સમાચાર

ધરારથી મકાન વેચી દેવા કહી મહિલા તથા તેની ત્રણ પુત્રી પર કરાયો હુમલો

પાંચ શખ્સ રાત્રિના સમયે ઘરમાં ઘૂસી ગયાઃ

જામનગર તા. ૪: જામનગરના સિદ્ધાર્થનગરમાં રહેતા એક મહિલાને મકાન વેચી નાખવાનું કહી એક શખ્સે ઝઘડો કર્યા પછી રાત્રિના સમયે તે મહિલાના ઘરમાં ઘૂસી ગયેલા પાંચ શખ્સે હુમલો કરી આ મહિલા તથા તેની ત્રણ પુત્રીને માર મારી પતાવી દેવાની ધમકી આપી હતી.

જામનગરના મયુરનગર રોડ પર આવેલા સિદ્ધાર્થનગર શેરી નં.૪માં રહેતા રામીબેન ભીમજીભાઈ પરમાર નામના મહિલાને થોડા દિવસ પહેલાં મુકેશ પારીયા નામના શખ્સે તમારૃં મકાન મને વેચી દો તેમ કહ્યું હતું પરંતુ રામીબેને મકાન વેચવાની ના પાડતા મુકેશ ઉશ્કેરાયો હતો.

ત્યારપછી મંગળવારની રાત્રે રામીબેન પોતાના ઘરે હતા ત્યારે યોગેશ ચાવડા અને ચિરાગ ચાવડા નામના શખ્સ ઘૂસી ગયા હતા. તેની પાછળ કૈલાસ ઝાલા, મુકેશ પારીયા, જીતુ પારીયા પણ ધસી આવ્યા હતા. આ વ્યક્તિઓએ છરી, કોસ, લાકડી, પાઈપથી હુમલો કરી રામીબેન તથા તેમની ત્રણ પુત્રીને માર માર્યાે હતો અને જાનથી મારી નાખવાની ધમકી આપી હતી. રામીબેને સિટી સી ડિવિઝન પોલીસ સ્ટેશનમાં પાંચેય સામે ફરિયાદ નોંધાવી છે. ભારતીય ન્યાય સંહિતાની કલમ ૩૨૯ (૩), ૧૩૧, ૧૧૫, ૩૫૧ (ર), ૫૪, જીપી એક્ટની કલમ- ૧૩૫ (૧) હેઠળ ગુન્હો નોંધ્યો છે.

જો આપને આ પોસ્ટ ગમી હોય તો શેર કરો...