સાની ડેમના ૫ૂનઃ નિર્માણનું કામ તાકીદે પૂર્ણ કરવા વિપક્ષની માંગણી

Author: નોબત સમાચાર

સાની ડેમના ૫ૂનઃ નિર્માણનું કામ તાકીદે પૂર્ણ કરવા વિપક્ષની માંગણી

ગુજરાત પ્રદેશ કોંગ્રેસ સમિતિના ઉપપ્રમુખ ભીખુભાઈ વારોતરિયાની રાજ્ય સરકારને રજૂઆતઃ

જામનગર તા. ર૪: દેવભૂમિ દ્વારકા જિલ્લાના કલ્યાણપુર તાલુકાના સાની ડેમનું પુનઃ નિર્માણનું કામ તાત્કાલિક ધોરણે પૂર્ણ કરવા માંગણી સાથે રજૂઆત કરવામાં આવી છે.

આ વિસ્તારના ખેડૂતોએ રાજ્યના મુખ્યમંત્રી ભૂપેન્દ્ર પટેલ તથા જળ સંપત્તિ મંત્રી કુંવરજી બાવળિયા સમક્ષ રજૂઆત કરી હતી. સાની ડેમના કામ પુનઃ નિર્માણનું કામ ઘણાં લાંબા સમયથી ચાલી રહ્યું છે. આ ડેમ મારફત દ્વારકા, કલ્યાણપુર તાલુકાના ૧૧૦ ગામને પીવાનું અને સિંચાઈનું પાણી આપવામાં આવે છે.

૩૦ વર્ષથી બનાવાયેલ આ ડેમમાં અગાઉ બે વખત દરવાજા તૂટ્યા હતાં જેના કારણે ત્રણ વર્ષ ડેમ ખાલી રહ્યો હતો. પરિણામે લોકોને મુશ્કેલીનો સામનો કરવો પડ્યો હતો.

હાલમાં સાની ડેમનું કામ ચાલુ હોવાથી છ વર્ષથી ડેમ ખાલી છે, અને હજુ એકાદ વર્ષ જેટલો સમય થશે તેમ જોવા મળી રહ્યું છે.

આ કામ પ્રથમ કોન્ટ્રાક્ટર, એજન્સીએ ભાવ વધારાના કારણે કામ અધુરૂ છોડી દીધું હતું. ત્યારપછી બીજી એજન્સી કામ કરે છે, પણ ગોકળગાયની ગતિએ થાય છે.

સાની ડેમમમાંથી સિંચાનું પાણી મેળવવા માટે હજારો ખેડૂતોએ પાંચથી દસ હજાર ફૂટ સુધીની પાણીની પાઈપલાઈનો નાંખી છે, અને લાખો રૂપિયાનો ખર્ચ કર્યો છે, છતાં પાણી નહીં મળવાના કારણે દુષ્કાળ જેવી સ્થિતિનો સામનો કરવો પડે છે. કોઈપણ ડેમનું કામ એકાદ-બે વર્ષમાં પૂર્ણ થતું હોય છે, જ્યારે સાની ડેમનું કામ છ વર્ષથી ચાલે છે.

આ પ્રજાલક્ષી કામ હોવા છતાં તાલુકા પંચાયત, જિલ્લા પંચાયત, રાજ્ય સરકાર અને કેન્દ્રમાં ભાજપના ચુંટાયેલા પ્રતિનિધિઓ કે કોઈપણ સ્થાનિક પ્રતિનિધિએ આ સાની ડેમની ચિંતા કરતા નથી. જે દુઃખદ બાબત છે.

આ ડેમ ઉપર ખેડૂતોને પીવાના પાણી તથા સિંચાઈ માટેનો આધાર હોય, સાની ડેમનું બાકી રહેલ કામ તાત્કાલિક પૂર્ણ કરવા અને ખેડૂતોની મુશ્કેલી ઝડપથી દૂર કરવા ગુજરાત પ્રદેશ કોંગ્રેસ સમિતિના ઉપપ્રમુખ ભીખુભાઈ વારોતિયાએ રજૂઆત-માંગણી કરી છે.

જો આપને આ પોસ્ટ ગમી હોય તો શેર કરો...