ગુલાબનગર-અન્નપૂર્ણા ચોકડી સહિત બે સ્થળે ૪૧ દબાણો હટાવવા કાર્યવાહી શરૂ

Author: નોબત સમાચાર

ગુલાબનગર-અન્નપૂર્ણા ચોકડી સહિત બે સ્થળે ૪૧ દબાણો હટાવવા કાર્યવાહી શરૂ

સતત બીજા દિવસે નદીના પટમાં ચૂસ્ત પોલીસ બંદોબસ્ત સાથે મેગા ઓપરેશન ડિમોલિશન યથાવતઃ

જામનગર તા. ૨૪: જામનગર મહાનગરપાલિકા દ્વારા ગઈકાલે નાગમત્તિ નદીના કિનારે રણજીત સાગર રોડ પર અલગ અલગ બે સ્થળોએ ડિમોલેશનની કાર્યવાહી હાથ ધરવામાં આવ્યા બાદ આજે સતત બીજા દિવસે પણ દબાણ હટાવ ઝુંબેશ અવિરત હાથ ધરવામાં આવી હતી. જેના માટે ૬ જેસીબી મશીન અને ૫ ટ્રેક્ટર, ૧ હિટાચી મશીન સહિતની મશીનરી કામે લગાડવામાં આવી છે, અને ૪૧ ગેરકાયદેસર દબાણકારોને નોટિસ પાઠવ્યા બાદ આજે સતત બીજા દિવસે ફરી મેગા ડીમોલેશન કરવામાં આવ્યું છે, અને અન્નપૂર્ણા ચોકડી તેમજ ગુલાબ નગર વિસ્તારમાં અલગ અલગ બે સ્થળે ૪૧ ગેર કાયદેસર દબાણો વાળી જગ્યા ખુલ્લી કરાવવામાં આવી રહી છે.

રિવર ફ્રન્ટ પ્રોજેક્ટને લઈને બે દિવસ પહેલા કાલાવડ નાકા બહારથી લઈને છેક નાગેશ્વર વિસ્તાર સુધીમાં નદીના પટમાં ખડકી દેવાયેલા દબાણોને દૂર કરવા માટેની કાર્યવાહી હાથ ધરાઈ હતી, અને સવાર થી સાંજે ૬ વાગ્યા સુધીમાં ૫૦,૦૦૦ ફૂટ જગ્યા ખુલ્લી કરી લેવાઈ હતી.

ત્યારબાદ એક દિવસ નો વિરામ રાખીને ગઈકાલે સવારે રંગમતિ નદી કિનારે જુદા જુદા બે સ્થળોએ તંત્ર દ્વારા મેગા ડિમોલેશન હાથ ધરવામાં આવ્યું છે, અને ૩૩ જેટલા ગેરકાયદે દબાણો દૂર કરીને અંદાજે ૬૬,૦૦૦ ફૂટ જગ્યા ખુલ્લી કરાવવા માટેની કાર્યવાહી હાથ ધરવામાં આવી હતી, અને મોડી સાંજ સુધી આ કાર્યવાહી અવિરત ચાલુ રાખવામાં આવી હતી અને સમગ્ર દબાણો દૂર કરી લેવાયા હતા.

આજે શહેરના ગુલાબ નગર વિસ્તાર અને અન્નપૂર્ણા ચોકડીના બે અલગ અલગ જગ્યાએ દબાણ હટાવ ની કામગીરી ચાલુ રાખવામાં આવી છે. શહેરમાં વરસાદી પાણી ન ભરાય તે ના ભાગરૂપે નદીના પટના આ દબાણો દૂર કરવામાં આવી રહૃાા છે.

જામનગર મહાનગરપાલિકાના કમિશનર ડી.એન. મોદીના સીધા માર્ગદર્શન હેઠળ ડી.એમ.સી. દેવેન્દ્રસિંહ ઝાલા, આસી. કમિશનર ભાવેશ જાનીની રાહબરી હેઠળ કંટ્રોલિંગ અધિકારી મુકેશ વરણવા તથા એસ્ટેટ શાખાની ટીમ, ટીપીઓ શાખાની ટીમ, ફાયર વિભાગની ટુકડી વગેરે મળી ૧૦૦ થી વધુ કર્મચારીઓ આજના મેગા ડિમોલેશનમાં જોડાયા છે, અને અલગ અલગ બે ટીમો બનાવાઈ છે.

સમગ્ર ડિમોલીશનની કાર્યવાહી હાથ ધરવા માટે ૬ જેસીબી મશીનો, ૧ હિટાચી મશીન, ૫ ટ્રેક્ટર સહિતની મશીનરીના ઉપયોગ કરવામાં આવ્યો છે, અને વહેલી સવારથી પાડતોડની કાર્યવાહી શરૂ કરી દેવામાં આવી છે. જે બન્ને સ્થળે સિટી ડી.વાય.એસ.પી. જે.એન.ઝાલા અને સિટી એ. ડિવિઝન ના પી.આઈ. એન.એ.ચાવડા ની રાહબરી હેઠળ મોટો પોલીસ કાફલો બંદોબસ્ત માં જોડાયો છે જેમાં મહિલા પોલીસની પણ મોટી ટીમ સાથે રાખવામાં આવી છે.

જેમાં બન્ને સ્થળે ૪૧ જેટલા દબાણવાળું અન અધિકૃત બાંધકામ તોડી પાડી તમામ જગ્યા ખુલ્લી કરાવાઈ રહી છે.

જો આપને આ પોસ્ટ ગમી હોય તો શેર કરો...