જામનગરની સગીરા સાથે અણછાજતા અડપલાં કરી નરાધમે ગુજાર્યું દુષ્કર્મ

Author: નોબત સમાચાર

જામનગરની સગીરા સાથે અણછાજતા અડપલાં કરી નરાધમે ગુજાર્યું દુષ્કર્મ

હરકતમાં આવેલી પોલીસે આરોપીની શરૂ કરી શોધઃ

જામનગર તા.૬: જામનગરની સવા સોળ વર્ષની એક તરૂણીને વાઘેરવાડામાં રહેતો શખ્સ સમજાવી ફોસાલવી પોતાની સાથે અવાવરૂ જગ્યાએ લઈ ગયા પછી આ શખ્સે અણછાજતા અડપલાં કર્યા પછી તેણી પર દુષ્કર્મ ગુજાર્યાની ફરિયાદ પોલીસમાં થઈ છે. ચોંકી ઉઠેલી પોલીસે તાત્કાલિક ગુન્હો નોંધી નરાધમની શોધ શરૂ કરી છે.

જામનગરમાં ચકચાર જગાવનાર આ કિસ્સાની વધુ વિગત મુજબ જામનગરના એક વિસ્તારમાં વસવાટ કરતા પરિવારની સવા સોળ વર્ષની પુત્રી પોતાના ઘરેથી કેટલોક સામાન ખરીદવા માટે નીકળ્યા પછી માર્ગમાં તેણીને શાક માર્કેટ નજીકના વાઘેરવાડામાં રહેતો મહેબુબ હનીફ ગજીયા નામનો વાઘેર શખ્સ મળ્યો હતો.

આ શખ્સે તે સગીરાને વાતોમાં ચઢાવ્યા પછી પોતાની સાથે એક અવાવરૂ સ્થળે લઈ જઈ તેણી સાથે અણછાજતા અડપલાં શરૂ કર્યા હતા. આ શખ્સની હરકતને સમજે તે પહેલા મહેબુબે તેણીના શરીર પર હાથ ફેરવવા ઉપરાંત આંગળી વડે દુષ્કર્મ ગુજાર્યું હતું.

હેબતાઈ ગયેલી તરૂણીએ કોઈ રીતે આ શખ્સના સકંજામાંથી છટકી જઈ પોતાના ઘેર પહોંચ્યા પછી વાલીને તે બાબતની જાણ કરતા તે સગીરા સાથે પોલીસ મથકે ધસી આવેલા વાલીએ પીઆઈ એલ.એ. ચાવડા સમક્ષ વિતક વર્ણવી હતી. જેના પગલે તરત જ હરકતમાં આવેલા પીઆઈ ચાવડાએ પીએસઆઈ બી.એલ. ઝાલાને ગુન્હો નોંધવા સુચના આપતા સિટી-એ ડિવિઝન પોલીસ સ્ટેશનમાં મહેબુબ હનીફ ગજીયા સામે આઈપીસી ૩૬૩, ૩૫૪ (૧), ૩૭૬ (ર) (જે) તથા પોક્સો એક્ટની કલમ ૪, ૮, ૧૨ હેઠળ ગુન્હો નોંધવામાં આવ્યો છે. પીઆઈ એન.એ. ચાવડાએ આરોપીને પકડી પાડવા ચક્રો ગતિમાન કર્યા છે. જ્યારે ભોગ બનનાર સગીરાને તબીબી ચકાસણી સહિતની કાર્યવાહી માટે ખસેડવામાં આવી છે.

જો આપને આ પોસ્ટ ગમી હોય તો શેર કરો...