દ્વારકાના સિટી તલાટી સામે મહિલા સ્વાતંત્ર્ય સેનાનીના પરિવારે ઉપવાસ-આંદોલનની ચિમકી આપતા ખળભળાટ

Author: નોબત સમાચાર

દ્વારકાના સિટી તલાટી સામે મહિલા સ્વાતંત્ર્ય સેનાનીના પરિવારે ઉપવાસ-આંદોલનની ચિમકી આપતા ખળભળાટ

શું આઝાદીની લડત આટલા માટે લડ્યા હતાં ? વયોવૃદ્ધ વયે આવી હાલત ? કોણ છાવરે છે ?

દ્વારકા તા. ૬ઃ દ્વારકાના મહિલા સ્વાતંત્ર્ય સેનાનીના પરિવારને ગામના નમૂના નં. ર માટે તલાટીએ ૧૩ વખત ધક્કા ખવડાવતા અંતે આ પરિવારે મુખ્યમંત્રીને રજૂઆત કરી આંદોલનની ચીમકી આપતા દ્વારકામાં ખળભળાટ મચી ગયો છે.

દેશની સ્વતંત્રતા માટે જેનું અગત્યનું યોગદાન છે, તેવા વાયડા પરિવારને દ્વારકા શહેરના તલાટી કમ મંત્રી કડોરીયાએ ગામના નમૂના નં. ર કાઢી આપવા માટે ૧૩ વખત ધક્કા ખવડાવીને હેરાન-પરેશાન કરી રહ્યાં હોવાના આક્ષેપ સાથે આ પરિવારે અંતે રાજ્યના મુખ્યમંત્રી ભૂપેન્દ્રભાઈ પટેલને લેખિત રજૂઆત કરી છે, આ સાથે ઉપવાસ આંદોલનની ચીમકી ઉચ્ચારી છે.

દ્વારકાના નિવાસી સ્વતંત્રતા સેનાની પરિવારના એડવોકેટ અશોક વાયડાના પત્ની પણ એડવોકેટ છે. ઈશ્વરીબેન વાયડાએ ગુજરાત હાઉસીંગ બોર્ડ પાસેથી દ્વારકામાં ક્વાર્ટર નં. ૮૭ ખરીદ કરેલ છે. જેની લોન માટે તેઓને તલાટી પાસેથી ગામ નમૂના નં. ર ના પ્રમાણિત નકલની જરૃરિયાત હોય, જેના માટે તલાટીએ ૧૩ વખત ધક્કા ખવડાવીને હેરાન-પરેશાન કરી રહ્યાંનું રજૂઆતમાં જણાવ્યું છે. આ મહિલા સ્વાતંત્ર્ય સેનાની પરિવારના નરેન્દ્રભાઈ વાયડા પણ માજી તલાટી કમ મંત્રી તરીકે સરકારમાં સેવા કરી ચૂક્યા છે. તેઓ પણ તલાટી કચેરીના ધક્કા ખાઈ ચૂક્યા, પણ તેમને પરિણામ ન મળ્યું, અંતે તલાટી કચેરી પાસે અશ્રુભીની આંખે વલોપાત કરતા નરેન્દ્રભાઈએ તેમની આ વ્યથાનો વિડીયો પણ પ્રજા અને રાજય સરકાર સમક્ષ મૂક્યો છે. દ્વારકાના મામલતદાર વિક્રમભાઈ વરૃ પાસે પણ આ બાબતે પરિવારે કાલાવાલા કર્યા હોવાનું જાણવા મળે છે.

જો આપને આ પોસ્ટ ગમી હોય તો શેર કરો...