ધ્રોલ નજીક મોડપર પાટીયા પાસે મોટરમાંથી દારૂની ૪૮ બોટલ પકડાઈઃ રીસીવરનું નામ ખૂલ્યું

Author: નોબત સમાચાર

ધ્રોલ નજીક મોડપર પાટીયા પાસે મોટરમાંથી દારૂની ૪૮ બોટલ પકડાઈઃ રીસીવરનું નામ ખૂલ્યું

મોટી ખાવડી સ્થિત ગ્રીન ટાઉનશીપ, અલીયા ગામમાંથી મળ્યો દારૂનો જથ્થોઃ

જામનગર તા. ૧૬: જામનગર-રાજકોટ રોડ પર ધ્રોલ નજીક મોડપર ગામના પાટીયા પાસેથી એલસીબીએ એક ઈકો મોટરમાં લઈ જવાતી દારૂની ૪૮ બોટલ કબજે કરી છે મોટરના ડ્રાઈવર મૂળ મધ્યપ્રદેશ ના શખ્સે તે જથ્થો મંગાવનાર જોડીયાના પીઠડ ગામના શખ્સનું નામ આપ્યું છે. જ્યારે અલીયા ગામમાં મકાનમાંથી પાંચ બોટલ મળી આવી છે અને મોટી ખાવડી સ્થિત ગ્રીન ટાઉન શીપમાં આવેલા એક રહેણાંક માંથી બીયરના પાંચ ટીન અને દારૂની બે ખાલી અને એક ભરેલી બોટલ મળી આવી છે.

જામનગર-રાજકોટ માર્ગ પર ઈંગ્લીશ દારૂની મોટરમાં હેરાફેરી થઈ રહી હોવાની બાતમી એલસીબીના કાસમ બ્લોચ, મયુરસિંહ, હિતેન્દ્રસિંહ જાડેજાને મળતા પીઆઈ વી.એમ. લગારીયાને તેની વિગતો અપાયા પછી પીએસઆઈ પી.એન. મોરી, એ.કે. પટેલના વડપણ હેઠળ સ્ટાફે વોચ રાખી હતી.

તે દરમિયાન મોડપર ગામના પાટીયા નજીક એક હોટલની સામેના રોડ પરથી જીજે-૧૮-એએમ ૪૫૮૫ નંબરની ઈકો મોટર પસાર થઈ હતી. તે મોટરને રોકાવી એલસીબીએ ચકાસતા તેમાંથી ભારતીય બનાવટના અંગ્રેજી શરાબની ૪૮ બોટલ મળી આવી હતી. તે જથ્થા સાથે મૂળ મધ્યપ્રદેશના અલીરાજપુર જિલ્લાના પાનગુડા ગામના મુકેશ ખુમાનભાઈ મેડા નામના શખ્સની અટકાયત કરાઈ હતી. રૂા.૩ લાખની મોટર તથા એક મોબાઈલ પણ ઝબ્બે લેવામાં આવ્યો છે.

આ આરોપીની પ્રાથમિક પૂછપરછમાં તેણે આ જથ્થો જોડિયા તાલુકાના પીઠડ ગામના ધર્મેન્દ્ર રાવત નામના શખ્સે મંંગાવ્યો હોવાની કબૂલાત કરી છે. બંને સામે ગુન્હો રજીસ્ટર કરાવાયો છે.

જામનગર-ખંભાળિયા રોડ પર આવેલા મોટી ખાવડી સ્થિત ગ્રીન ટાઉનશીપના સેક્ટર નં.૨૫ અને રૂમ નં.૪૧૧માં ગઈકાલે બપોરે મેઘપર પોલીસ સ્ટેશનના સ્ટાફે પૂર્વ બાતમીના આધારે દરોડો પાડી તલાશી લેતા ત્યાંથી દારૂની બે ખાલી બોટલ, રૂા.૩ હજારની કિંમતની દારૂની ભરેલી બોટલ તેમજ બીયરના ચાર ટીન મળી આવ્યા હતા. પોલીસે બોટલ, કેન કબજે કરી લીધા છે. આ રૂમમાં રહેતા મૂળ મોટી બાણુગાર ગામના હિતેશ નટુભાઈ સાપરીયા સામે ગુન્હો નોંધવામાં આવ્યો છે.

જામનગર તાલુકાના અલીયા ગામમાં આવેલા સુરેશ વજુભાઈ બરબચીયા નામના શખ્સના મકાનમાં ગઈકાલે પંચકોશી એ ડિવિઝન પોલીસે દરોડો પાડી તલાશી લેતા ત્યાંથી દારૂની પાંચ બોટલ મળી આવી હતી. દરોડા પહેલા નાસી ગયેલા સુરેશ વજુભાઈની પોલીસે શોધ હાથ ધરી બોટલ કબજે કરી છે.

જો આપને આ પોસ્ટ ગમી હોય તો શેર કરો...