રાજ્યસેવકના બોર્ડવાળી મોટર સાથે ઝડપાયેલા શખ્સ સામે વધુ સાત ગુન્હા

Author: નોબત સમાચાર

રાજ્યસેવકના બોર્ડવાળી મોટર સાથે ઝડપાયેલા શખ્સ સામે વધુ સાત ગુન્હા

રાજકોટ, ખંભાળિયાના બે આસામીને રૂ.૪૮ લાખમાં નવડાવી નાખ્યાઃ કેટલીક નંબર પ્લેટ, શિલ્ડ કરાયા કબજેઃ

ખંભાળિયા તા.૨૭ : ખંભાળિયામાંથી એડી. કલેક્ટર અને એસડીએમ લખેલી એક મોટર ઝડપાયા પછી તે મોટરમાં જઈ રહેલા ધર્મના ભાઈ-બહેન ની પોલીસે પૂછપરછ શરૂ કરી હતી. તેમાં મોટા કૌભાંડનો પર્દાફાશ થયો છે. રિમાન્ડ પર રહેલા શખ્સે રાજકોટ તથા ખંભાળિયાના બે આસામીને તબીબી ક્ષેતામાં એડમીશન તેમજ પીઆઈ તરીકેની નિમણૂક અપાવવાનં ુ કહી રૂ.૪૮ લાખ ઉપરાંતની છેતરપિંડી કર્યાનું બહાર આવયું છે. આ શખ્સ સામે આજે સવારે વધુ સાત ગુન્હા નોંધાયા છે. પોલીસે તેના કબજામાંથી વધુ એક મોટર અને કેટલીક નંબર પ્લેટ, શિલ્ડ અને સરકારના લેટરપેડ કબજે કરી તપાસ આગળ ધપાવી છે.

ખંભાળિયા શહેરમાંથી એક મોટરમાં એડીશનલ કલેક્ટર અને એસડીએમનંુ બોર્ડ તેમજ મોટર પર લાલ લાઈટ જોવા મળતા રવિવારે ખંભાળિયા પોલીસે તે મોટર અટકાવી પૂછપરછ કરતા ખંભાળિયાના શખ્સ અને તેની ધરમની માનેલી બહેન રાજ્ય સેવક ન હોવા છતાં આ પ્રકારના બોર્ડ લગાડીને પચ્ચીસેક દિવસથી મોટર ફેરવતા હોવાનું ખૂલ્યું હતું. ખંભાળિયાની રામનાથ સોસાયટી નજીક બથીયા ચોકમાંથી પસાર થયેલી આ મોટરને પોલીસે અટકાવી હતી. જીજે-૩-કેએફ ૯૧૧૩ નંબરની આ મોટરમાં આગળ જોતા એડી. કલેક્ટર અને એડી. ડિસ્ટ્રી. મેજી. (પ્રોબેશન) અને આરએસી તેમજ એડીએમ (પ્રોબેશન) લખેલા બોર્ડ જોવા મળ્યા હતા.

તે ઉપરાંત આ મોટરમાં ઉપરના ભાગે લાઈટ પણ લગાડેલી જોવા મળી હતી. પોલીસે તે મોટરના ચાલક ખંભાળિયાના જીલ ભરતભાઈ પંચમતીયા અને સાથે રહેલી મૂળ જૂનાગઢના વિસાવદર તાલુકાના બિલખા ગામની વતની અને હાલમાં રાજકોટના યુનિ. રોડ પર સ્પીપા ક્ષેત્રિય તાલીમમાં રહેતી કેશાબેન કેતનભાઈ દેસાઈની પૂછપરછ કરી હતી.

આ બંને વ્યક્તિ રાજ્ય સેવક તરીકેનો કોઈ હોદ્દો ધરાવતા ન હોવા છતાં ઉપરોક્ત બોર્ડ મારીને છેલ્લા પચ્ચીસેક દિવસથી ફરતા હોવાનું જણાઈ આવ્યું હતું. પોલીસે જીલ ભરતભાઈ તથા તેની ધરમની બહેન કેશા કેતનભાઈ સામે ગુન્હો નોંધી મોટર કબજે કરી હતી. તે પછી ગઈકાલે ખંભાળિયાના પીએસઆઈ એમ.આર. બારડે બંને સામે છેતરપિંડી-વિશ્વાસઘાત અંગે ગુન્હો નોંધ્યો છે.

આ વ્યક્તિઓની હાથ ધરાયેલી પૂછપરછમાં મોટા કૌભાંડનો પર્દાફાશ થવા પામ્યો છે. આ બંને યુવક-યુવતીએ રાજકોટના યુનિવર્સિટી રોડ પર શારદાનગરમાં રહેતા મૂળ જુનાગઢના બિલખાના કેતન ભાઈ રમેશભાઈ દેસાઈ સાથે પણ છેતરપિંડી આચર્યું ખૂલ્યું છે. કેતનભાઈને ગઈ તા.૧૪-૧ર-ર૩ના દિને આ વ્યક્તિએ વિશ્વાસમાં લીધા હતા.

જીલ ભરતભાઈએ પોતાની ઓળખ જામનગરની એમ.પી. શાહ મેડિકલ કોલેજના એડીશનલ ડીન તરીકેની આપી તેમના પુત્ર શિવરાજને મેડિકલ કોલેજમાં પ્રવેશ અપાવી દેવાનું કહી અને તેની સામે નોંધાયેલા નાર્કોટીક્સ એક્ટના ગુન્હામાંથી બહાર કઢાવી દેવાનું કહી કટકે કટકે રૂ.૪૮,૨૨,૬૮૦ પડાવી લીધા હતા.

તે જ રીતે ખંભાળિયાના તેજસભાઈ અશ્વિનભાઈ રામાવત નામના આસામીને પણ જીલ ભરતભાઈએ પોતાની ઓળખ એડી. કલેક્ટર અને એસડીએમ તરીકેની આપી પોલીસ ભરતીમાં તેઓને પીઆઈ તરીકે નિમણૂક અપાવવાનું કહી, તેમના નાના ભાઈ મીહિરને એડી. કલેક્ટરના પીએ તરીકે નિમણૂક અપાવવાનું કહી રૂ.૩ર હજાર પડાવી લીધા હતા. તેવી કબૂલાત મળતા પોલીસે કેતનભાઈ તથા તેજસભાઈને પોલીસ મથકે આવી જવા સૂચના આપી હતી અને તે પછી કેતનભાઈની ફરિયાદ પરથી કુલ રૂ.૪૮, ૫૪,૮૮૦ની છેતરપિંડી કરવા અંગે બીજો ગુન્હો નોંધ્યો છે.

તા.રરની રાત્રે જીલ ભરતભાઈની અટકાયત કર્યા પછી તેના રિમાન્ડની માગણી કરી હતી. અદાલતે રિમાન્ડ મંજૂર કરતા ઉપરોક્ત બે ગુન્હા નોંધાવા પામ્યા છે. તે ઉપરાંત આજે સવારે પોલીસે વધુ સાત ગુન્હા નોંધ્યા છે. આ શખ્સ પાસેથી જીજે-૩૭-એમ ૨૮૧૬ નંબરની કીયા કંપનીની કેરેન્સ મોટર પણ કબજે કરવામાં આવી છે. તે ઉપરાંત કેટલાક સરકારી લેટરપેડ ઉપરાંત મોબાઈલ સહિતનો મુદ્દામાલ કબજે કરવામાં આવ્યો છે. આ શખ્સ પાસેથી કેટલાક ચંદ્રકો પણ કબજે થયા છે અને ગવર્મેન્ટ ઓફ ગુજરાત લખેલી કેટલીક નેમપ્લેટ મળી છે.

જો આપને આ પોસ્ટ ગમી હોય તો શેર કરો...