Author: નોબત સમાચાર
ધોરીમાર્ગ પર મોડીરાત્રે સ્ટંટ કરતા ત્રણ ટાબરીયા સામે કાર્યવાહીઃ વાહનો ડીટેઈન
વાલીઓને બોલાવી ટ્રાફિક પોલીસે આપી કડક સૂચનાઃ ત્રણેય ટાબરિયા સામે કાર્યવાહીઃ
જામનગર તા.૨૭ : જામનગરના લાલપુર બાયપાસથી ઠેબા બાયપાસ વચ્ચે મંગળવારની રાત્રે એક મોટરસાયકલ તથા બે સ્કૂટર પર જોખમી સ્ટંટ કરી રહેલા ત્રણ ટાબરીયાને ટ્રાફિક શાખાએ શોધી કાઢી ત્રણેય વાહન ડીટેઈન કર્યા છે અને ત્રણેયના વાલીઓને બોલાવી કડક સૂચના આપી છે. ધોરીમાર્ગ પર ફૂલસ્પીડમાં ચલાવાતા આ વાહનોનો વીડિયો એક મોટરચાલકે ઉતારી લઈ વાયરલ કર્યા પછી પોલીસ હરકતમાં આવી હતી.
જામનગરના લાલપુર બાયપાસથી ઠેબા બાયપાસ વચ્ચેના રોડ પર મંગળવારે રાત્રે ત્રણેક વાગ્યે એક સ્પ્લેન્ડર મોટરસાયકલ તથા બે એક્સેસ સ્કૂટર પુરપાટ ઝડપે દોડી જતા જોવા મળ્યા હતા. ફૂલસ્પીડમાં ભગાવાતા આ વાહનોની પાછળ આવતી એક મોટરમાં જઈ રહેલા વ્યક્તિએ તે વાહનોનો પીછો કરી વીડિયો ઉતારી લીધો હતો.
તે વીડિયો સોશિયલ મીડિયા પર વાયરલ થયા પછી જામનગરની ટ્રાફિક શાખાના પીઆઈ એમ.બી. ગજ્જર તથા સ્ટાફે આ વાહનોની શોધખોળ શરૂ કરી હતી. જેમાં જીજે-૧૦ સીએચ ૭૭૨ નંબરનું બાઈક તથા જીજે-૧૦-ઈડી ૭૭૬૨ અને જીજે-૧૦-ડીએલ ૧૨૬૦ નંબરના એક્સેસ સ્કૂટરના સગડ મળ્યા હતા.
તે વાહનોના નંબર પરથી આગળ વધેલી પોલીસ તપાસમાં જામનગરના કાલાવડ નાકા વિસ્તારમાં રહેતા ત્રણ ટાબરીયા ઉપરોક્ત વાહન મંગળવારની રાત્રે ફૂલસ્પીડમાં ચલાવી સ્ટંટ કરતા હોવાનું બહાર આવ્યું હતું. બાઈક ચલાવી રહેલા વ્યક્તિની ઉંમર માત્ર ૧પ વર્ષની અને સ્કૂટર પર સ્ટંટ કરતા બે ચાલકની ઉંમર માત્ર ૧૭ વર્ષની હોવાનું જણાઈ આવ્યું હતું.
ત્રણેય વાહનચાલકોને પોતાના વાહનો સાથે ટ્રાફિક શાખાની કચેરીએ આવી જવાની સૂચના અપાયા પછી ત્રણેય વાહન ટ્રાફિક શાખાએ ડીટેઈન કરી લઈ પોલીસ હેડ કવાર્ટરમાં જમા કરાવી દીધા છે અને ત્રણેય વાહનચાલક સામે મોટર વ્હીકલ એક્ટની કલમો હેઠળ કાર્યવાહી કરાઈ છે.
ઉપરોક્ત ત્રણેય ટાબરીયા પોતાની વય નાની હોવા છતાં અન્ય લોકોની જિંદગી જોખમાય તે પ્રકારના સ્ટંટ કરતા હોવાથી ત્રણેયના વાલીઓને પણ સૂચના આપવામાં આવી છે.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
