જામનગરમાં મહિલા પર ઘરમાં ઘૂસી કરાયો નિર્લજ્જ હુમલોઃ નવાગામમાં પ્રૌઢને માર પડ્યો

Author: નોબત સમાચાર

જામનગરમાં મહિલા પર ઘરમાં ઘૂસી કરાયો નિર્લજ્જ હુમલોઃ નવાગામમાં પ્રૌઢને માર પડ્યો

યુવતીને મૂકવા આવેલા બાઈકચાલકે યુવકને લમધાર્યાે:

જામનગર તા. ૧૪: જામનગરના જૂના રેલવે સ્ટેશન પાસે ગઈરાત્રે એક યુવાને પોતાના પરિવારની યુવતીને બાઈકમાં મૂકવા આવેલા શખ્સને પૂછતા તેને ધોકાવી નખાયો છે. જ્યારે ત્રણ માળીયા આવાસમાં એક મહિલાના ઘરમાં ઘૂસી પાડોશી શખ્સે નિર્લજ્જ હુમલો કર્યાે છે. ઉપરાંત ઢોરની લે-વેચનું કામ કરતા કાલાવડના નવાગામના પ્રૌઢને બે શખ્સે માર મારી લોહીલુહાણ કરી નાખ્યા હતા.

જામનગરના જૂના રેલવે સ્ટેશન પાસે આવેલા ભીમવાસ શેરી નં.૩માં રહેતા ગૌતમ હીરાભાઈ ખીમસુરીયા નામના યુવાન ગઈકાલે રાત્રે સાડા દસ વાગ્યે પોતાના શ્વાનને ચલાવવા માટે લઈ જતા હતા ત્યારે એક અજાણ્યો બાઈકચાલક તેમના પરિવારની એક યુવતીને બાઈક પર મૂકવા આવતો હતો.

તેને રોકી ગૌતમભાઈએ અત્યારે તેની સાથે ક્યા ગયો હતો તેમ પૂછતા ઉશ્કેરાયેલા બાઈકચાલકે ગાળો ભાંડી હુમલો કરી ગૌતમભાઈને પછાડી દઈ લાતો ફટકારી જાન થી મારી નાખવાની ધમકી આપ્યાની પોલીસમાં ફરિયાદ કરાઈ છે.

જામનગરના ધરારનગર વિસ્તારમાં આવેલા ત્રણ માળીયા આવાસમાં રહેતા સાજીદાબેન ઈબ્રાહીમભાઈ આમરોણીયા નામના મહિલા ગુરૂવારે રાત્રે પોતાના ઘરે હતા ત્યારે ત્યાં જ રહેતો જાવેદ જમાલ ખુંભીયા નામનો શખ્સ ઘરમાં ઘૂસી ગયો હતો તેણે આ મહિલા પર નિર્લજ્જ હુમલો કરી ઝપાઝપી કરી હતી. આ વેળાએ સાજીદાબેનનો પુત્ર વચ્ચે પડતા તેને ઈજા કરી જાવેદે ઘરમાં તોડફોડ કર્યાની સિટી સી ડિવિઝન પોલીસ સ્ટેશનમાં ફરિયાદ નોંધાવી છે.

કાલાવડ તાલુકાના નવાગામમાં રહેતા ધીરૂભાઈ ગગજીભાઈ વાઘેલા ઢોરની લે વેચનું કામ કરે છે. તે બાબતે બોલાચાલી થતાં વિજય અજમલ વાઘેલા, દિનેશ અજમલ વાઘેલાએ ગઈકાલે સાંજે ધીરૂભાઈને રોકી લઈ ગાળો ભાંડ્યા પછી સળીયા તથા ઢીકાપાટુથી હુમલો કરી માર માર્યાે હતો. માથામાં ઈજા પામેલા ધીરૂભાઈને દવાખાને ખસેડાયા છે. તેમના પત્ની પ્રભાબેને કાલાવડ ગ્રામ્ય પોલીસ મથકમાં બંને હુમલા ખોર સામે ફરિયાદ કરી છે.

જો આપને આ પોસ્ટ ગમી હોય તો શેર કરો...