જામનગરમાં પૂ. રસાર્દ્રરાયજીના શુભવિવાહ દિવ્યતાપૂર્વક થયા સંપન્ન

Author: નોબત સમાચાર

જામનગરમાં પૂ. રસાર્દ્રરાયજીના શુભવિવાહ દિવ્યતાપૂર્વક થયા સંપન્ન

શ્રીનાથજી મંદિરના તિલકાયત વિશાલબાવા સહિતના વૈષ્ણવાચાર્યોએ પાઠવ્યા આશીર્વાદ

જામનગર તા. ૫ઃ જામનગરની શ્રી મોટી હવેલીના ગાદિપતિ અને પુષ્ટિ સિદ્ધાંત સંરક્ષણ શિરોમણી મહાકવિ પૂ. ૧૦૮ હરિરાયજી મહારાજના સુપૌત્ર તથા પૂ. ગો. વલ્લભરાયજી મહોદયના જયેષ્ઠ આત્મજ ચિ. પૂ. ગો. શ્રી રસાર્દ્રરાયજીના શુભવિવાહ પ્રસ્તાવ પ્રસંગોની શરૃઆત પહેલા શુભ વિવાહ પ્રસ્તાવના ઉપલક્ષમાં સાંસ્કૃતિક કાર્યક્રમ પછી ગઈકાલે ભારતના વિવિધ સ્થાનો પરથી પધારેલા આચાર્યોની હાજરીમાં વલ્લભ કુળનો ભવ્ય શુભ વિવાહ યોજાયો હતો.

હાથી ઘોડા અને પાલખીની ભવ્ય સવારીઓ સાથે અદ્ભુત અલૌકિક વરઘોડો યોજાયો હતો. આ અવસરે વલ્લભકુળના તમામ વૈષ્ણવાચાર્યો જોડાયા હતાં. વરઘોડો શુભ પ્રસ્તાવના સ્થળથી શરૃ થઈ અમ્યુઝમેન્ટ પાર્ક, રણજીતનગર, એરફોર્સ ગેઈટ, થઈ પ્રસ્તાવના સ્થળ પર સં૫ન્ન થયો હતો. રસ્તામાં ઠેર ઠેર સ્વાગત કરવામાં આવ્યું હતું, અને બગીમાં સવાર વલ્લભકુલ ના ગોસ્વામીના દર્શનનો પણ વૈષ્ણવોએ લાભ લીધો હતો. વરઘોડામાં બહોળી સંખ્યામાં વૈષ્ણવો પણ જોડાયા હતા. વરઘોડો પૂર્ણ થયા પછી શુભ વિવાહની વિધિ શરૃ કરવામાં આવી હતી. શુભ વિવાહના પ્રસંગમાં ખાસ ઉપસ્થિત રહી વલ્લભકુલના ગોસ્વામીએ આશીર્વાદ પાઠવ્યા હતાં.

શ્રીનાથદ્વારા થી શ્રીનાથજી મંદિરના પરમ પૂજ્ય શ્રી તિલકાયત વિશાલબાવા, કાશી થી પૂજ્ય પા. ગો. શ્રી શ્યામ મનોહરજી, બરોડા થી દ્વારકેશબાવા, ઇન્દોરથી કલ્યાણરાયજી, અમદાવાદથી રાજુબાવા, કાશીથી શ્યામ મનોહર લાલજી, જુનાગઢથી નવનીતલાલજી, જેતપુરથી બાલકૃષ્ણ લાલજી, કેશોદથી ઉત્સવરાયજી, જૂનાગઢથી શરદરાયજી, સહિત વલ્લભકુલના વૈષ્ણવાચાર્યો ઉપસ્થિત રહ્યાં હતાં અને આશીર્વાદ પાઠવ્યા હતાં.

શુભ વિવાહ પ્રસ્તાવ સમિતિના પ્રમુખ જીતુભાઈ લાલ, ઉપપ્રમુખ કુરજીભાઈ મુંગરા, મનમોહનભાઈ સોની, સહખજાનચી દિનેશભાઈ મારફતિયા, સહ મંત્રી નલીનભાઇ રાજાણી, કારોબારી સભ્યો મિતેશભાઈ લાલ, વિપુલભાઈ કોટક, ચેતનભાઈ માધવાણી, દિનેશભાઈ રાબડીયા, અમુભાઈ કારિયા, મનસુખભાઈ રાબડીયા, જયેશભાઈ રૃપારેલિયા, તેમજ સમિતિના હોદ્દેદારો, તેમજ કાર્યકરોએ ઉત્સાહ પૂર્વક આ શુભ વિવાહ પ્રસ્તાવમાં સેવા આપી હતી.

આ પ્રસંગમાં શહેરના તેમજ દેશ વિદેશથી પધારેલા વૈષ્ણવોએ ઉમંગ અને ઉત્સાહથી ભાગ લીધો હતો. પૂજ્ય ગુરૃદેવના આંગણે આવેલા શુભ વિવાહ પ્રસ્તાવ પ્રસંગે સમગ્ર વૈષ્ણવ સમાજ સેવા તથા દર્શનો પરમ આનંદ પ્રાપ્ત કરી ધન્ય થયો હતો.

જો આપને આ પોસ્ટ ગમી હોય તો શેર કરો...