ઈન્સ્ટાગ્રામ પર પરિચય પછી લગ્નની લાલચ આપી દુષ્કર્મના ગુન્હામાં જામીન

Author: નોબત સમાચાર

ઈન્સ્ટાગ્રામ પર પરિચય પછી લગ્નની લાલચ આપી દુષ્કર્મના ગુન્હામાં જામીન

આ મામલો પ્રેમસંબંધનો હોવાની કરાઈ દલીલઃ

જામનગર તા. પઃ જામનગરના એક યુવતી સાથે ઈન્સ્ટાગ્રામ મારફત પરિચયમાં આવેલા એક શખ્સે પ્રેમસંબંધ બાંધી લગ્નની લાલચ આપી તેણી પર અવારનવાર દુષ્કર્મ ગુજાર્યાની પોલીસમાં ફરિયાદ કરાઈ હતી. આ આરોપીએ જામીનમુક્ત થવા કરેલી અરજી અન્વયે આરોપી પક્ષે કરેલી દલીલો ગ્રાહ્ય રાખી અદાલતે તેને જામીન પર મુક્ત કર્યાે છે.

જામનગરના એક યુવતીએ સિટી સી ડિવિઝન પોલીસ સ્ટેશનમાં થોડા સમય પહેલાં ફરિયાદ નોંધાવી તેમાં જણાવ્યું હતું કે શક્તિસિંહ જોરૃભા ચુડાસમા નામના શખ્સનો ઈન્સ્ટાગ્રામ સાઈટ પર સંપર્ક થયો હતો. તે પછી પરિચય આગળ વધતા શક્તિસિંહે તે યુવતીને લગ્નની લાલચ આપી જુદી જુદી હોટલમાં લઈ જઈ દુષ્કર્મ ગુજાર્યું હતું.

આ શખ્સે ફર્નિચરની એક દુકાનમાં પણ તેણી પર દુષ્કૃત્ય ગુજાર્યાની કેફિયત ફરિયાદમાં અપાતા પોલીસે ગુન્હો નોંધી આરોપી શક્તિસિંહની ધરપકડ કરી હતી. આ આરોપીએ જામીનમુક્ત થવા અદાલતમાં અરજી કરી હતી. તે અરજી અન્વયે ફરિયાદ પક્ષ તથા તપાસનીશ અધિકારીએ વાંધો લીધો હતો. તેની સામે આરોપી પક્ષે દલીલ કરી હતી કે, ભોગ બનનાર યુવતી એજ્યુકેટેડ છે અને તેઓએ પ્રેમસંબંધની કબૂલાત પણ આપી છે. ત્યારે આ કિસ્સો પ્રેમસંબંધનો છે. તેને રેપના અન્ય કિસ્સાઓ સાથે જોડી શકાય નહીં.

અદાલતે બંને પક્ષની દલીલો સાંભળ્યા પછી આરોપી શક્તિસિંહને જામીન પર મુક્ત કરવાનો હુકમ કર્યાે છે. આરોપી તરફથી વકીલ રાજેશ ગોસાઈ, વિશાલ જાની, એચ.આર. ગોહિલ, રજનીકાંત નાખવા, નિતેશ મુછડીયા રોકાયા છે.

જો આપને આ પોસ્ટ ગમી હોય તો શેર કરો...