સલમાન ખાનના શુટીંગ સ્થળે અજાણ્યા શખ્સે ઘૂસી બિશ્નોઈના નામે આપી ધમકી

Author: નોબત સમાચાર

સલમાન ખાનના શુટીંગ સ્થળે અજાણ્યા શખ્સે ઘૂસી બિશ્નોઈના નામે આપી ધમકી

શંકાસ્પદ વ્યકિતને પોલીસે પકડી પૂછપરછ શરૃ કરીઃ

મુંબઈ તા. ૫ઃ બોલિવુડ એકટર સલમાનખાન આ દિવસોમાં તેની આગામી ફિલ્મ 'સિકંદર' અને ટીવી શો 'બિગ બોસ-૧૮' શૂટિંગમાં વ્યસ્ત છે અને હવે અભિનેતા સાથે જોડાયેલા એક આશ્ચર્યજનક સમાચાર સામે આવી રહ્યા છે. એક અજાણ્યો વ્યકિત કથિત રીતે તેના શૂટિંગમાં ઘૂસ્યો હતો. આ પછી, જ્યારે તે વ્યકિતની પૂછપરછ કરવામાં આવી તો તેણે બિશ્નોઈને કહી દઈશ ? પોલીસ હવે શંકાસ્પદ વ્યકિતને પૂછપરછ માટે શિવાજી પાર્ક પોલીસ સ્ટેશન લઈ ગઈ છે.

પોલીસ સૂત્રોના જણાવ્યા અનુસાર, બુધવારે રાત્રે મુંબઈના ઝોન-૫માં બોલિવુડ એકટર સલમાનખાનના શૂટિંગ લોકેશનમાં એક શંકાસ્પદ વ્યકિત ઘુસ્યો હતો. આ પછી અધિકારીઓએ તરત જ આના પર કાર્યવાહી કરી હતી. હવે તે વ્યકિતની ધરપકડ કર્યા પછી પોલીસ આ મામલે તપાસ કરી રહી છે.

દરમિયાન, મુંબઈ પોલીસના જણાવ્યા અનુસાર, દાદર પશ્ચિમમાં સલમાન ખાનનું શૂટિંગ ચાલી રહ્યું હતું, જ્યાં એક ચાહક અભિનેતાનું શૂટિંગ જોવા માંગતો હતો, પરંતુ સુરક્ષાકર્મીઓએ તેને ધક્કો માર્યો અને બંને વચ્ચે ઝઘડો થયો. છોકરાએ ગુસ્સામાં બિશ્નોઈનું નામ લીધું, બિશ્નોઈને કહી દઈશ એવું કહ્યું હતું ત્યારબાદ ગાર્ડે પોલીસને બોલાવી અને તેને તેમના હવાલે કર્યો. પોલીસના જણાવ્યા અનુસાર, તે વ્યકિત મુંબઈનો રહેવાસી છે, જો કે હજુ સુધી તેની સાથે કોઈ શંકાસ્પદ બાબત જણાઈ નથી.

તમને જણાવી દઈએ કે સલમાન ખાનને ગેંગસ્ટર લોરેન્સ બિશ્નોઈના નામે ઘણી વખત ધમકીઓ મળી ચુકી છે. બાબા સિદ્દીકીની હત્યા બાદ તેની સુરક્ષા પણ પહેલા કરતા વધારી દેવામાં આવી છે. થોડા મહિના પહેલા એક વ્યકિતએ મુંબઈ ટ્રાફિક પોલીસને મેસેજ કર્યો હતો, જેમાં તે વ્યકિતએ તેમને ધમકી આપી હતી અને તેમની પાસેથી પ કરોડ રૃપિયાની માંગણી કરી હતી અને માફી માંગી હતી. આ પછી પોલીસે તેમની પૂછપરછ કરતાં જાણવા મળ્યું કે તે વ્યકિત ઝારખંડનો છે. જો કે, બાદમાં વ્યકિતએ કહ્યું કે આ મેસેજ ભૂલથી મોકલવામાં આવ્યો હતો. તમને જણાવી દઈએ કે હવે અભિનેતાને સુરક્ષા આપવામાં આવી છે અને તેના બાંદ્રા ઘર અને પનવેલમાં પણ કડક સુરક્ષા વ્યવસ્થા છે.

જો આપને આ પોસ્ટ ગમી હોય તો શેર કરો...