Author: નોબત સમાચાર
આયુર્વેદિક સોસાયટીમાં મકાનમાં થઈ ચોરીઃ મુદ્દામાલ સાથે એક મહિલાની અટક
ચાંદીનું બિસ્કિટ તથા રૂ. ૧૦ હજાર રોકડા ચોરાયા હતાઃ
જામનગર તા. ૨૯: જામનગરની ગુલાબકુંવરબા આયુર્વેદિક સોસાયટીમાં રહેતા એક સિક્યુરિટી ગાર્ડના મકાનમાં ગુરૂવારની રાત્રે ચોરી થઈ હતી. ત્યાંથી ચાંદીનું બિસ્કિટ અને રૂ. ૧૦ હજાર રોકડા ચોરાઈ ગયા હતા. તે ગુન્હામાં પોલીસે એક મહિલાને પકડી પાડ્યા છે અને રૂ. ૭ હજાર રોકડા, ચાંદીનું બિસ્કિટ કબજે કર્યા છે.
જામનગરની ગુલાબ કુંવરબા આયુર્વેદિક સોસાયટી માં રહેતા અને સિક્યુરિટી ગાર્ડ તરીકે નોકરી કરતા ખીમજીભાઇ રણમલભાઈ ચાવડા ગઈ તા.૨૫ની રાત્રે પોતાના પુત્ર સંજયના ઘેર રાત રોકાવવા માટે ગયા હતા.
ત્યાંથી બીજા દિવસે સવારે તેઓ જ્યારે પોતાના ઘરે પરત આવ્યા તે દરમિયાન તેમના મકાનમાં ચોરી થઈ ગઈ હતી. રાત્રિના દસ વાગ્યાથી સવારના દસ વાગ્યા દરમિયાન તેમના મકાનના તાળા તોડી અંદરથી કોઈ તસ્કરે લોખંડના કબાટમાં રહેલી રૂ. ૧૦,૦૦૦ની રોકડ તથા રૂ. ૧૦૦૦ની કિંમતની ૨૫ ગ્રામનું ચાંદીનું બિસ્કિટ તેમજ બેંકની પાસબુક, ચેકબુક વગેરે ઉઠાવી ગયો હતો. ખીમજીભાઈએ સીટી બી ડિવિઝન પોલીસ સ્ટેશનમાં તેની ફરિયાદ નોંધાવી હતી.
ઉપરોક્ત ગુન્હાની તપાસ સિટી બી ડિવિઝનના પીઆઈ પી.પી. ઝાની સૂચનાથી પીએસઆઈ કે.ડી. જાડેજા તથા સર્વેલન્સ સ્ટાફે શરૂ કરી હતી. જેમાં એએસઆઈ રઘુભા પરમાર, મયુરરાજસિંહ, સાજીદ બેલીમને બાતમી મળી હતી કે, જૂના રેલવે સ્ટેશન પાસે ઉભેલી એક મહિલા આ ગુન્હામાં સંડોવાયેલી છે. ત્યાં દોડી ગયેલી પોલીસ ટૂકડીએ ત્યાંથી પુરીબેન કાનાભાઈ વાજલીયા નામના મહિલાને પકડી પાડ્યા હતા. સાતરસ્તા નજીક પ્રદર્શન મેદાન પાછળ ઝૂંપડામાં રહેતા આ મહિલાને હાથમાં રહેલી થેલીમાંથી રૂ. ૭ હજાર રોકડા અને ચાંદીની લગડી મળી આવી હતી. આ મહિલાની પૂછપરછ કરાતા તેણે ત્રણેક દિવસ પહેલાં ગુલાબકુંવરબા સોસાયટીમાં ચોરી કર્યાની કબૂલાત આપી છે અને ખીમજીભાઈ રણમલભાઈ તેમજ સુરજ ખીમજીભાઈ ચાવડાના આધાર કાર્ડ પણ કાઢી આપ્યા છે. પોલીસે મુદ્દામાલ કબજે કરી આરોપી મહિલાની ધરપકડ કરી છે.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
