નારણપર પાસે મોડી રાત્રે બાઈક સાથે મોટર ટકરાતા ઘવાયેલા દંપતીનું મૃત્યુઃ મોટરચાલક સામે નોંધાયો ગુન્હો

Author: નોબત સમાચાર

નારણપર પાસે મોડી રાત્રે બાઈક સાથે મોટર ટકરાતા ઘવાયેલા દંપતીનું મૃત્યુઃ મોટરચાલક સામે નોંધાયો ગુન્હો

અકસ્માતના સ્થળે ૫ત્નીનું મૃત્યુ પછી સારવારમાં પતિએ પણ દમ તોડ્યોઃ

જામનગર તા. ૨૯: જામનગર-સમાણા રોડ પર નારણપર ગામ પાસે ગઈરાત્રે જામનગરથી પરત જતાં એક દંપતીના બાઈક સાથે સમાણા તરફથી દોડી આવેલી મોટરે રોંગ સાઈડમાં આવી અકસ્માત સર્જતા પાછળ બેસેલા પત્નીનું ઘટનાસ્થળે અને પતિનું સારવાર દરમિયાન મૃત્યુ નિપજ્યું છે. પોલીસે મોટરના ચાલક સામે ગુન્હો નોંધ્યો છે.

જામનગર-સમાણા માર્ગ પર આવેલા નારણપર ગામથી જામનગર તરફના રોડ પર એક હોટલ પાસેથી ગઈરાત્રે એકાદ વાગ્યે નારણપર ગામના જયેશભાઈ જયંતિભાઈ ફલીયા તથા તેમના પત્ની કાજલબેન બાઈક પર પસાર થતાં હતા.

ગઈકાલે રાત્રે આ દંપતી કોઈ કામથી જામનગર આવ્યું હતું. ત્યાંથી રાત્રે એકાદ વાગ્યે મોટરસાયકલ પર તેઓ નારણપર પરત જતા હતા. ત્યારે ઓમ શાંતિ હોટલ પાસે રોંગ સાઈડમાં પુરપાટ ઝડપે ધસી આવેલી જીજે-૩-એનકે ૨૬૪૧ નંબરની મોટરે તેઓને જબરદસ્ત ટક્કર મારી હતી.

હાલમાં અત્યંત બિસ્માર બની ગયેલા આ રોડ પર વાહનચાલકો રોડ શોધવાના બદલે ખાડા શોધી માંડ માંડ વાહન ચલાવી શકે છે ત્યારે રોંગ સાઈડમાં આવેલી મોટરે ઠોકર મારતા હજુ દોઢ વર્ષ પહેલા જ લગ્નગ્રંથીથી બંધાયેલું આ દંપતી રોડ પર ફેંકાઈ ગયું હતું. ગંભીર ઈજા પામેલા જયેશભાઈ તથા તેમના પત્ની કાજલબેન લોહીલુહાણ હાલતમાં જોવા મળ્યા હતા.

અકસ્માતના સ્થળેથી પસાર થતાં અન્ય કોઈ વાહન ચાલકે અકસ્માતની જાણ કરતા ૧૦૮ તથા પોલીસ ટીમ દોડી આવ્યા હતા. તેઓએ ઈજાગ્રસ્તોને સારવાર માટે ખસેડવાની તજવીજ કરી હતી પરંતુ કાજલબેનનું ઘટનાસ્થળે જ મૃત્યુ નિપજ્યાનું ખૂલ્યું હતું. જ્યારે જયેશભાઈને સારવાર માટે એમ્બ્યુલન્સમાં જી.જી. હોસ્પિટલમાં ખસેડાયા હતા. જ્યાં તેઓનું પણ મૃત્યુ થયું છે.

આ બનાવની મૃતકના મોટાભાઈ મનોજભાઈ ફલીયાએ પંચકોશી બી ડિવિઝન પોલીસ સ્ટેશનમાં ફરિયાદ નોંધાવી છે. પોલીસે મોટરના ચાલક સામે ગુન્હો નોંધ્યો છે.

જો આપને આ પોસ્ટ ગમી હોય તો શેર કરો...