Author: નોબત સમાચાર
પેટમાં દુખાવો ઉપડતા શ્રમિક મહિલાનું મૃત્યુઃ સર્પ કરડી જતાં વૃદ્ધનું થયું મૃત્યુ
મકરાણી સણોસરાના વૃદ્ધને હૃદયરોગનો હુમલોઃ
જામનગર તા. ૨૨: જોડિયાના બાલાચડીમાં ખેતમજૂરી માટે આવીને રહેતા એક પરપ્રાંતિય શ્રમિક મહિલાને પેટમાં દુખાવો ઉપડ્યા પછી તેણીનું મૃત્યુ નિપજ્યું છે. જ્યારે કાલાવડના મોટી માટલી ગામમાં સર્પ કરડી જતાં પરપ્રાંતિય વૃદ્ધનું મૃત્યુ થયું છે. ઉપરાંત મકરાણી સણોસરા ગામના વૃદ્ધને હૃદયરોગનો હુમલો ભરખી ગયો છે.
જોડિયા તાલુકાના બાલાચડી ગામમાં આવેલા વિક્રમસિંહ વાઘેલા નામના ખેડૂતના ખેતરમાં મજૂરીકામ માટે આવીને રહેતા મૂળ મધ્ય પ્રદેશના ધાર જિલ્લાના કુકશી તાલુકાના જીરપનીયા ગામના વતની સોહનભાઈ શેરસિંગ અનારે નામના શ્રમિકના પત્ની સીમાબેન (ઉ.વ.૨૨) ને છેલ્લા પંદરેક દિવસથી પેટમાં દુખાવો થતો હતો. તે દરમિયાન શુક્રવારે રાત્રે આ મહિલાને અસહ્ય દુખાવો ઉપડતા તેઓને હડિયાણામાં આવેલા દવાખાને સારવાર માટે લઈ જવાયા હતા ત્યાંથી જાંબુડાની રેફરલ હોસ્પિટલમાં વધુ સારવાર માટે લઈ જવાયેલા સીમાબેનને ફરજ પરના તબીબે મૃત્યુ પામેલા જાહેર કરતા પતિ સોહન અનારે પોલીસને જાણ કરી છે. જોડિયા પોલીસે મૃતદેહને પીએમ માટે ખસેડી આગળની કાર્યવાહી કરી છે.
કાલાવડ તાલુકાના મોટી માટલી ગામમાં આવેલા પ્રવીણભાઈ અરજણભાઈ ઉમરેટીયા નામના ખેડૂતના ખેતરમાં મજૂરીકામ માટે આવીને રહેતા મૂળ દાહોદ જિલ્લાના ધાનપુર તાલુકાના અલીન્દ્રા ગામના વતની મૂળિયાભાઈ વરસીંગભાઈ ડાંગી નામના ૮૦ વર્ષના વૃદ્ધ રવિવારે સવારે છએક વાગ્યે ખેતરમાં ઓરડી પાસે લઘુશંકા કરવા માટે બેઠા હતા ત્યારે તેઓને હાથની આંગળીમાં કોઈ ઝેરી સર્પ કરડી જતા આ વૃદ્ધને ઝેરી અસર થઈ ગઈ હતી. તેઓનું સારવારમાં ખસેડવામાં આવ્યા પછી મૃત્યુ નિપજ્યું છે. તેમના પુત્ર કેવલભાઈ ડાંગીએ પોલીસને જાણ કરી છે.
કાલાવડના મકરાણી સણોસરા ગામમાં વસવાટ કરતા ચનાભાઈ કાનજીભાઈ બાલધા (ઉ.વ.૬૯) નામના વૃદ્ધ ગઈરાત્રે પોતાના ઘરે હતા ત્યારે છાતીમાં દુખાવો થવા લાગતા તેઓને કાલાવડ દવાખાને ખસેડવામાં આવ્યા હતા જ્યાં ફરજ પરના તબીબે આ વૃદ્ધનું હૃદયરોગના હુમલાથી મૃત્યુ થયાનું જાહેર કર્યું છે. રાજકોટમાં રહેતા પુત્ર ચંદ્રેશભાઈ બાલધાએ પોલીસને જાણ કરી છે.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
