સગીરાનું અપહરણ કરી અડપલા કરનાર નગરના શખ્સને પાંચ વર્ષની સખત કેદ

Author: નોબત સમાચાર

સગીરાનું અપહરણ કરી અડપલા કરનાર નગરના શખ્સને પાંચ વર્ષની સખત કેદ

લગ્નની લાલચ આપી નસાડી ગયો હતોઃ

જામનગર તા. ૧૭: જામનગરના વીસ વર્ષના એક શખ્સે પાંચ વર્ષ પહેલાં એક સગીરાને લગ્નની લાલચ આપી પોતાની સાથે નસાડી હતી. પોલીસે ગુન્હો નોંધી શરૂ કરેલી તપાસમાં આ શખ્સ ઝડપાઈ ગયો હતો. તેણે સગીરા સાથે અડપલા કર્યાનું ખૂલ્યું હતું. તે કેસ ચાલી જતાં અદાલતે આરોપીને પાંચ વર્ષની સખત કેદની સજા ફટકારી છે.

જામનગરના લાલવાડી નજીક આવેલા અટલ રેસીડેન્સી આવાસમાં રહેતો પાર્થ કેતનભાઈ જેઠવા નામનો વીસ વર્ષનો શખ્સ ગઈ તા.૩૦-૧૨-૨૦ના દિને સવા બાર વર્ષની સગીરાને લગ્નની લાલચ આપી નસાડી ગયો હોવાની પોલીસમાં ફરિયાદ કરાઈ હતી.

કામ પર ગયેલા આ સગીરાના માતા-પિતા જ્યારે ઘરે પાછા આવ્યા ત્યારે તેઓને પુત્રીને ઘરમાં ન જોઈ ઘરમાં રાખવામાં આવેલા સીસીટીવી કેમેરા ચકાસવામાં આવતા તેને પાર્થ જેઠવા આ સગીરાને લઈ જતો જોવા મળ્યો હતો. પોલીસમાં તેની ફરિયાદ કરાતા પોલીસે ગુન્હો નોંધી પાર્થ જેઠવાની ધરપકડ કરી હતી. આ શખ્સની પૂછપરછમાં તેણે સગીરા સાથે અડપલા કર્યાનું ખૂલ્યું હતું. પોલીસે આઈપીસી ૩૬૩, ૩૬૬, ૩૫૪ (એ) (બી) તેમજ પોક્સો એક્ટની કલમ ૧ર હેઠળ ગુન્હો નોંધ્યો હતો.

આ કેસ અદાલતમાં ચાલી જતા અદાલતે આરોપીને આઈપીસી ૩૫૪ (એ) (બી) તેમજ પોક્સો એક્ટ હેઠળ પાંચ વર્ષની સખત કેદની સજા અને આઈપીસી ૩૬૩ના ગુન્હામાં ત્રણ વર્ષની કેદ અને કુલ રૂ.૭ હજારનો દંડ ફટકાર્યાે છે. સરકાર તરફથી પીપી ભારતીબેન વાદી રોકાયા હતા. સગીરાને કમ્પેઈન્સેશનમાંથી રૂ.૫૦ હજાર વળતર પેટે ચૂકવવામાં આવશે.

જો આપને આ પોસ્ટ ગમી હોય તો શેર કરો...