સંગમ બાગ પાસે મોટર-સ્કૂટરમાંથી બીયરની ચાર બોટલ સાથે ત્રણ ઝબ્બે

Author: નોબત સમાચાર

સંગમ બાગ પાસે મોટર-સ્કૂટરમાંથી બીયરની ચાર બોટલ સાથે ત્રણ ઝબ્બે

ઈલેકટ્રીક સ્કૂટરમાં લઈ જવાતી ઈંગ્લીશ દારૂની ૧૦ બોટલ ઝબ્બેઃ

જામનગર તા. ૧૭: જામનગરના નવાગામ ઘેડ વિસ્તારમાંથી પોલીસે એક ઈલેકટ્રીક સ્કૂટરમાં લઈ જવાતી ઈંગ્લીશ દારૂની ૧૦ બોટલ કબજે કરી છે. તે જથ્થા સાથે એક શખ્સની ધરપકડ કરાઈ છે. સંગમ બાગ પાસે સ્કૂટર તથા મોટરમાંથી બીયરની ચાર બોટલ સાથે ત્રણ ઝડપાયા છે અને ત્રણબત્તી નજીકથી એક શખ્સ દારૂની અડધી બોટલ સાથે મળી આવ્યો છે.

જામનગરના નવાગામ ઘેડ વિસ્તારમાં આવેલી મધુવન સોસાયટીના ખૂણા પાસેથી ગઈકાલે સાંજે પસાર થતાં જીજે-૧૦-ડીએસ ૮૮૨૨ નંબરના ઈલેકટ્રીક સ્કૂટરને પેટ્રોલિંગમાં રહેલા સિટી બી ડિવિઝનના સ્ટાફે રોકાવી સ્કૂટરની તલાશી લેતા તેમાંથી ભારતીય બનાવટના અંગ્રેજી શરાબની દસ બોટલ મળી આવી હતી. આ જથ્થા સાથે નવાગામ ઘેડના હનુમાન ચોકમાં રહેતા અશોક શરદભાઈ શિંગાળા નામના શખ્સની પોલીસે ધરપકડ કરી ૭૦ હજારનું સ્કૂટર, દારૂ તથા એક મોબાઈલ કબજે કર્યાે છે.

જામનગરના તીનબત્તી વિસ્તારમાં આવેલા પેનોરમા કોમ્પલેક્ષ પાસેથી ગઈકાલે રાત્રે ખોળમીલના ઢાળીયા નજીક હેમતસિંહની ચાલીમાં રહેતા વિજયસિંહ જગતસિંહ પરમાર નામનો શખ્સ ઈંગ્લીશ દારૂની અડધી બોટલ સાથે ઝડપાઈ ગયો છે.

જામનગરના રણજીત સાગર રોડ પર આવેલા સંગમ બાગ રોડ પરથી ગઈકાલે રાત્રે જીજે-૧૦-ડીઈ ૯૭૩૨ નંબરની ક્રેટા મોટર તથા જીજે-૧૦-સીઆર ૯૦૭૯ નંબરનું જ્યુપીટર સ્કૂટર પસાર થતા હતા. આ બંને વાહનને રોકાવી સિટી એ ડિવિઝનના સર્વેલન્સ સ્ટાફે તલાશી લેતાં તેમાંથી બીયરની ચાર બોટલ મળી આવી હતી. પોલીસે બંને વાહન, બીયર કબજે કરી મહાવીરનગરમાં રહેતા કેશુભાઈ નાથાભાઈ સીંગરખીયા તેમજ લાલપુરના મોડપર ગામના પ્રફુલ લક્ષ્મણભાઈ ગોજીયા, પાલાભાઈ નારણભાઈ આંબલીયા નામના ત્રણ શખ્સની ધરપકડ કરી છે. પ્રફુલ તથા પાલાભાઈ પાસેથી બીયરની ઉપરોક્ત બોટલ કેશુભાઈએ મંગાવી હોવાનું ખૂલ્યું છે.

જો આપને આ પોસ્ટ ગમી હોય તો શેર કરો...