Author: નોબત સમાચાર
ગલકુંડમાં વાદળ ફાટતા ખાપરી નદીમાં ઘોડાપૂરઃ ડાંગ જિલ્લામાં મેઘો મંડાયોઃ ઠંડક
ગઈકાલે અમદાવાદ અને નવસારીમાં પણ વરસાદ પડ્યો હતોઃ
અમદાવાદ તા. ૧૪: ડાંગ જિલ્લામાં વરસાદી માહોલ જામ્યો છે, અને ગલકુંડ વિસ્તારમાં વાદળ ફાટતા ખાપરી નદીમાં ઘોડાપૂર આવ્યું છે. ગઈકાલે પણ અમદાવાદ તથા નવસારીમાં વરસાદ પડ્યો હતો.
ગુજરાતમાં છેલ્લા કેટલાય દિવસથી ભારે ઉકળાટ અને ગરમી પડી રહી છે. ત્યારે ગઈકાલે અમદાવાદ સહિત અનેક વિસ્તારમાં વરસાદ વરસ્યો હતો. ત્યારે આજે ડાંગના આહવાના ગલકુંડ વિસ્તારમાં આભ ફાટ્યું છે. ધોધમાર વરસાદને પગલે નદીમાં ઘોડાપૂર આવ્યા છે તેમજ વાતાવરણમાં ઠંડક પ્રસરી ગઈ છે.
હવામાન વિભાગે દક્ષિણ ગુજરાતમાં વરસાદની આગાહી કરી હતી. તે મુજબ આજે ડાંગના આહવામાં ધોધમાર વરસાદ વરસ્યો છે. ગલકુંડ વિસ્તારમાં તો આભ ફાટ્યું છે જેના પગીે નીચાણવાળા વિસ્તારોમાં ઠેર-ઠેર પાણી ભરાયા છે. ડાંગ જિલ્લામાં હાલ વરસાદી માહોલ છવાયો છે. સાપુતારા સહિતના વિસ્તારોમાં છૂટાછવાયો વરસાદ વરસ્યો છે. ડાંગમાં વાદળ ફાટતા ખાપરી નદીમાં અચાનક ઘોડાપૂર આવ્યું હતું. નદીના કેચમેન્ટ વિસ્તારમાં આવતા ડુબાઉ કોઝવે પર નદીના પૂરના પાણી ફરી વળતા થોડા સમય માટે વાહનવ્યવહાર ખોરવાયો હતો. હવામાન વિભાગે જિલ્લામાં વરસાદની આગાહી કરી હતી.
ઉલ્લેખનિય છે કે ડાંગ ઉપરાંત નવસારીમાં પણ મેઘરાજા મન મૂકીને વરસ્યા હતાં. અમદાવાદમાં ભારે ઉકળાટ અને બફારાથી લોકો કંટાળી ગયા હતાં ત્યારે ગુરુવાર સાંજે મેઘરાજાનું ધમાકેદાર આગમન થયું હતું, જો કે સાંજના સમયે શહેરમાં વધુ ટ્રાફિક થતો હોવાથી વાહનચાલકો પણ મુશ્કેલીમાં મૂકાયા હતાં. દરમિયાન વસાદના પગલે વાતાવરણમાં ઠંડક થતા લોકોને રાહત મળી હતી.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
