આવતીકાલે બીજા તબક્કાની ૮૯ બેઠકોના મતદાનમાં ટકાવારી વધારવાના પ્રયાસો તેજ

Author: નોબત સમાચાર

આવતીકાલે બીજા તબક્કાની ૮૯ બેઠકોના મતદાનમાં ટકાવારી વધારવાના પ્રયાસો તેજ

ગઈકાલે સાંજથી પ્રચાર-પડઘમ થંભી ગયાઃ

નવી દિલ્હી તા. રપઃ આવતીકાલે બીજા તબક્કાની ૮૯ બેઠકોના મતદાનમાં ટકાવારી વધારવાના પ્રયાસો ચૂંટણી પંચે તેજ કર્યા છે, જ્યારે રાજકીય પક્ષો તથા ઉમેદવારોએ પણ આ દિશામાં પ્રયાસો વધાર્યા હોય તેમ જણાય છે.

ર૦ર૪ ની લોકસભા ચૂંટણીના બીજા તબક્કામાં ૧૩ રાજ્યોની ૮૯ બેઠકો પર આવતીકાલે ર૬ એપ્રિલે મતદાન થવાનું હોવાથી ગઈકાલે સાંજે આ બેઠકો પર પ્રચાર સમાપ્ત થઈ ગયો હતો.

સાત તબક્કામાં યોજાનારી લોકસભા ચૂંટણીના પ્રથમ તબક્કા હેઠળ ગયા શુક્રવારે ર૧ રાજ્યો અને કેન્દ્ર શાસિત પ્રદેશોની ૧૦ર બેઠકો માટે યોજાયેલી ચૂંટણીમાં ૬પ.પ ટકા મતદાન થયું હતું. ત્રીજા તબક્કાથી થનાર મતદાનની ટકાવારી વધારવાના પ્રયાસો ચૂંટણી પંચે તેજ કર્યા છે, અને આ દિશામાં રાજકીય પક્ષો તથા ઉમેદવારો પણ સચેત થયા છે.

ર૬ એપ્રિલે યોજાનારી બીજા તબક્કાની ચૂંટણીમાં કેરળની તમામ ર૦ બેઠકો, કર્ણાટકની ર૮ માંથી ૧૪ બેઠકો, રાજસ્થાનની ૧૩ બેઠકો, મહારાષ્ટ્રની ૮ બેઠકો, ઉત્તરપ્રદેશની ૮ બેઠકો, મધ્યપ્રદેશની ૭ બેઠકો, આસામની પ બેઠકો, બિહારની પ બેઠકો, છત્તીસગઢની ૩ બેઠકો, પશ્ચિમ બંગાળની ૩ બેઠકો, મણિપુરની એક, ત્રિપુરાની એક તથા જમ્મુ-કાશ્મીરની એક બેઠકનો સમાવેશ થાય છે.

ર૬ એપ્રિલે યોજાનારી ચૂંટણીમાં જે અગ્રણી નેતાઓનું ભાવિ નક્કી થવાનું છે તેમાં કેન્દ્રિય પ્રધાન રાજીવ ચંદ્રશેખર (તીરૂવનંતપુરમ્), ભાજપના તેજસ્વી સૂર્યા (કર્ણાટક), હેમામાલિની (ઉત્તરપ્રદેશ), અરૂણ ગોવિલ (ઉત્તરપ્રદેશ), રાહુલ ગાંધી (વાયનાડ), શશિ થરૂર (તિરૂવનંતપુરમ્), કર્ણાટકના નાયબ મુખ્યપ્રધાન ડી.કે. શિવકુમારના ભાઈ ડી.કે. સુરેશ (કોંગ્રેસ) અને કર્ણાટકના પૂર્વ મુખ્યપ્રધાન એચ.ડી. કુમારસ્વામી (જેડીએસ)નો સમાવેશ થાય છે.

આ અગાઉ ૧૯ એપ્રિલે યોજાયેલી પ્રથમ તબક્કાની ચૂંટણી પછી તમિલનાડુ (૩૯ બેઠકો), ઉત્તરાખંડ (પ બેઠકો), અરૂણાચલ પ્રદેશ (ર બેઠકો), મેઘાલય (ર બેઠકો), આંદામાન અને નિકોબાર (૧ બેઠક), મિઝોરમ (૧ બેઠક), નાગાલેન્ડ (૧ બેઠક), પુડુચેરી (૧ બેઠક), સિક્કિમ (૧ બેઠક), લક્ષદ્વીપ (૧ બેઠક) ની તમામ મતદાન પૂર્ણ થઈ ગયું હતું. બીજા તબક્કામાં ર૬ એપ્રિલે જે ૮૯ બેઠકો માટે મતદાન થવાનું છે તે પૈકી ર૦૧૯ માં એનડીએ પ૬ અને યુપીએ ર૪ બેઠકો જીતી હતી. ત્રીજા તબક્કા હેઠળ સાત મેના ૧ર ૧ર રાજ્યો અને કેન્દ્ર શાસિત પ્રદેશોની ૯૪ બેઠકો પર મતદાન યોજાશે.

જો આપને આ પોસ્ટ ગમી હોય તો શેર કરો...