ફલ્લાના રામપર પાસે ટ્રેક્ટર-ટ્રોલી સાથે મોટર ટકરાઈઃ એક યુવતીનું મૃત્યુ

Author: નોબત સમાચાર

ફલ્લાના રામપર પાસે ટ્રેક્ટર-ટ્રોલી સાથે મોટર ટકરાઈઃ એક યુવતીનું મૃત્યુ

ભીમગુડા ગામના દર્શનાર્થે જતાં યાત્રીકોને થઈ ઈજાઃ

જામનગર તા. ૪ઃ જામનગર-રાજકોટ ધોરીમાર્ગ પર ફલ્લા પાસે રામપર નજીક મંગળવારની રાત્રે ટ્રોલીવાળા ટ્રેકટર સાથે મોટર ટકરાઈ પડતા ટ્રોલી ઉંધી વળી ગઈ હતી. આ અકસ્માતમાં ટ્રોલીમાં જઈ રહેલા વાંકાનેરના ભીમગુડા ગામના એક યુવતીનું મૃત્યુ નિપજ્યું છે. મૃતક તથા તેમના પરિવારના વ્યક્તિઓ દ્વારકા દર્શનાર્થે જતા હતા ત્યારે માર્ગમાં તેઓને અકસ્માત નડ્યો હતો.

જામનગર-રાજકોટ માર્ગ પર આવેલા ફલ્લા ગામ નજીકના રામપર પાસેથી મંગળવારની રાત્રે સાડા બારેક વાગ્યે વાંકાનેર તાલુકાના ભીમગુડા ગામના કેટલાક વ્યક્તિઓ બેઠા હતા તે ટ્રેક્ટર પસાર થઈ રહ્યું હતું. આ ટ્રેક્ટરની ટ્રોલીમાં ૧૮ વ્યક્તિ દ્વારકા દર્શનાર્થે જતા હતા.

તે ટ્રેક્ટરની સાથે જીજે-૩૭-એમ ૬૪૬૫ નંબરની ટાટા કંપનીની હેરીયર મોટર ધડાકાભેર ટકરાઈ પડી હતી. જેના પગલે ટ્રોલી અને ટ્રેકટર ગોથું મારી ગયા હતા. આ અકસ્માતમાં કિરણબેન જયરાજભાઈ વીજવાડીયા (ઉ.વ.૧૯) નામના યુવતીનું ગંભીર ઈજા થવાથી મૃત્યુ નિપજ્યું છે. જ્યારે ટ્રોલીમાં બેસેલા શામજીભાઈ, વિજયભાઈ, જયરાજભાઈ, કાજલબેન, શાંતાબેન, અંકિતાબેન, મીઠુબેન, રવિભાઈ, દેવાયતભાઈ, ગૌતમભાઈ સહિતના વ્યક્તિને ઈજા થઈ હતી.

અકસ્માતની જાણ થતાં ૧૦૮ તથા પોલીસ ટીમ ધસી આવ્યા હતા. પોલીસે ભીમગુડા ગામના કરશનભાઈ જુગાભાઈ વીજવાડીયાની ફરિયાદ પરથી મોટરના ચાલક સામે ગુન્હો નોંધ્યો છે.

જો આપને આ પોસ્ટ ગમી હોય તો શેર કરો...